Həsən Həsənovun təqdim olunan monoqrafiyası Bakı Qız qalasının, Bakı bütpərəstlik kompleksinin, Qobustanın nadir qayaüstü təsvirləri kompleksinin hərtərəfli fənlərarası tədqiqinə ilk cəhddir. Əsərdə Qız qalasının bir çox gizli mənalarının açıldığını etiraf etməyə əsas verən tamamilə yeni konsepsiya təqdim olunur. Müəllif əvvəllər irəli sürülmüş versiyaların (Qız qalasının guya orta əsrlər - VI-XII əsrlər tikilisi olması; müdafiə və ya göz qalası olması; dünyagörüşü baxımından isə zərdüştilik ənənələrinə uyğun gəlməsi) tamamilə əsassız olduğunu sübut edir və öz nöqteyi-nəzərinin xeyrinə inandırıcı dəlillər gətirir.
Əsərdə Misir arxeologiyası üzrə aparıcı tədqiqatçıların qədim Misir mənbələrində Bakının adının çəkilməsi barədə unudulmuş məlumatları canlandırılır, Bakı bütpərəstlik kompleksinin planiqrafiyasında ulduz bürclərinin canlandırılması barədə məlumat verilir. Polisemantik etimologiya və linqvistik arxeologiya metodları burada xüsusi qeyd olunmalıdır, çünki müəllif onların köməyi ilə Bakının, Bakı Qız qalasının, həmçinin çoxsaylı toponim və antroponimlərin şifrini açır.
H.Həsənovun əsərinin yalnız tarix, memarlıq elmləri və sənətşünaslıq üçün deyil, həm də humanitar elmlər üçün əhəmiyyətini tam dəyərləndirmək olduqca çətindir. Çünki qədim Azərbaycan mədəniyyətinin dünyagörüşü və etnik zəmini haqqında məsələ ilk dəfə onun tərəfindən qoyulub və həll edilib.
Təqdim olunan kitab müəllifin "Qız qalası" əsərinin dördüncü nəşridir. İlk iki nəşr rus dilində olub, üçüncü nəşr ingilis dilində UNESCO tərəfindən həyata keçirilib. Hazırkı nəşr Azərbaycan dilində birincidir. Bu nəşrin əvvəlkilərdən fərqi kitabın iki cilddə olmasındadır. Bu səbəbdən əsərdə onun məzmununa xələl gətirmədən cüzi struktur dəyişiklikləri edilib. Əsərin iki cilddə çap olunması tədqiqatın iki yaxın, amma müstəqil mövzuları əhatə etməsi ilə bağlıdır. Birinci cild məşhur "Bakı Qız qalası"na, ikinci isə hazırkı Bakı şəhərinin öz başlanğıcını götürdüyü, çox az məlum olan, lakin izləri qalan "Bakı tanrıçılıq kompleksi"nə həsr olunub.

Həsən Həsənovun təqdim olunan monoqrafiyası Azərbaycanın qədim tarixinin mühüm məsələlərini əhatə edən kompleks fənlərarası tədqiqata ilk cəhddir. Monoqrafiyada Azərbaycan adlı ölkənin mənşəyi və onun hakim sülalələri kimi problemlər öz əksini tapıb. Əsərdə tutarlı arqumentlərə əsaslanan və Azərbaycan adlı ölkənin Aşşur imperiyasının süqutundan dərhal sonra yarandığını təsdiqləməyə imkan verən konsepsiya təqdim olunur.
Əsərin adından tarixin cəmi 10 ilindən söz açıldığı görünsə də, əslində kitab həmin dövrdən əvvəlki və sonrakı bir neçə əsrin hadisələrini əhatə edir. Antik dövr Azərbaycanının görkəmli dövlət xadimi Atropatın obrazı və onun Makedoniyalı İsgəndərlə əməkdaşlığı monoqrafiyada müfəssəl işıqlandırılır. Müstəqil Atropatena dövlətinin mərhələli yüksəliş prosesi elmdə ilk dəfə olaraq ətraflı təsvir edilir. Qədim Midiya və Atropatenanın ərazi hüdudları və onların etnik tərkibinə dair problemlərin əsərdə geniş işıqlandırılması faktını da xüsusi qeyd etmək lazımdır.
Kitab həm mütəxəssislər, həm də geniş oxucu kütləsi üçün nəzərdə tutulub.

Bu, tarixin ən uğurlu siyasi partnyorluğu idi - o, yaradıcı və uzaqgörən olduğu qədər də ehtiraslı və alovlu idi. Böyük Yekaterina ehtirası və imperiya iddiaları ilə ad çıxarmış bir qadın idi. Son dərəcə parlaq və həddən artıq istedadlı bir insan olan knyaz Potyomkin isə onun həyatının məhəbbəti və idarəetməni taxt-tacda onunla birgə həyata keçirən insan idi.
Onlar birlikdə Ukrayna və Krımı tutdular və dövrümüzdəki Rusiya imperiyasının sərhədlərini müəyyən etdilər. Onların münasibətləri o qədər coşğun idi ki, danışıb hakimiyyəti bölüşməyə razılaşdılar və Potyomkin öz bacısı qızları, Yekaterina isə gənc sevgililəri ilə sərbəst şəkildə sevgi münasibətləri yaşamağa başladı. Lakin bu "əkiz ruhlar"ın bir-birinə olan sevgisi heç vaxt bitmədi.
Saymon Sebaq Montefiorenin onların bir-birlərinə yazdığı sevgi məktublarından çıxış edərək və yeni geniş tədqiqatlar aparmaqla qələmə aldığı heyrətamiz və böyük rəğbətlə qarşılanan bu bioqrafik əsəri imperiyanın bu iki partnyorunu dövrlərinin azmanları kimi layiq olduqları yerə qoyur.

Romanovlar müasir tarixin dünyanın 1/6 hissəsinə hökm etmiş ən uğurlu sülaləsidir. Bir ailə müharibənin darmadağın etdiyi bir knyazlığı dünyanın ən böyük imperiyasına necə çevirmiş, sonra da bütün bunları necə itirmişdi?
Bu əsər bəziləri dahi, bəziləri dəli olan, amma hamısı müqəddəs avtokratiya ideyasından və imperiya ambisiyalarından ilham alan 20 çar və çariçanın hekayətidir. Montefiorenin xronikası saray sui-qəsdləri, ailə çəkişmələri, seksual dekadans və vəhşi ekstravaqantlıqla kölgələnən amansız imperiya quruculuğunun gizli dünyasını açır.
Rusiyanı idarə etmək həm müqəddəs imperial missiya, həm də zəhərli badədir: çarlardan 6-sı qətlə yetirilmiş və bütün Romanovlar daimi təhlükə altında yaşamışdı. Rusiyanı imperiyaya çevirmiş Böyük Pyotr doğma oğlunu işgəncə ilə öldürmüş, sarayını isə əyyaşlığa məcbur etdiyi şəxslərin, çılpaq təlxəklərin məclisi vasitəsilə idarə etmişdi... Ərini taxtdan salan, - bundan az sonra əri qətlə yetirilmişdi, - Böyük Yekaterina gənc məşuqları ilə əylənmiş, Avropanı heyran qoymuşdu... Pavel sonralar Napoleon istilası və Moskvanın yandırılması ilə üzləşəcək, Parisə qədər gedib çıxacaq oğlu I Aleksandrın saray əyanları tərəfindən boğulmuşdu... II Aleksandr təhkimliləri azad etmiş, beş sui-qəsddən sağ çıxmış və hələ heç bir dövlət başçısının yazmadığı açıq-saçıq məhəbbət məktubları yazmışdı... Romanovlar dövrü müharibə, inqilab və bütün çar ailəsinin əzablı ölümü ilə başa çatır.
Parlaq ədəbi məharətlə qələmə alınan "Romanovlar" əsəri zəfər və faciənin, məhəbbət və ölümün cəlbedici hekayəsidir.

Kralların təmtəraqlı taxtı,
Hökmdar əsalı ada.
Əzəmət ölkəsi, Marsın iqamətgahı,
Cənnəti salır yada.

Uilyam Şekspir

"BRİTANİYA və İRLANDİYANIN TARİXİ" Britaniya adalarının ilk insan məskənlərindən tutmuş müasir günümüzə qədərki dövrünü, müxtəlif hadisələrlə zəngin tarixini əks etdirir. Bu kitab romalıların işğalı, vikinqlərin hücumları, vətəndaş müharibələri və eramızın qlobal münaqişələri də daxil olmaqla Britaniyanın müharibələrdən yıpranmış keçmişini canlandırır. Kitabda həmçinin Orta əsrlər kilsə quruculuğundan və Yelizaveta dövrünün mədəni intibahından tutmuş viktorian dövrü sənayesinə və imperiyasına qədərki zəngin bir irs araşdırılır. Mötəbər mənbələrdən əldə edilmiş məlumatlarla zəngin olan bu kitab Britaniya tarixinin həlledici hadisələrinin möhtəşəm illüstrasiyalı salnaməsidir.

XX əsrin əvvəllərində Azərbaycanın Rusiya tərəfindən işğalı və müstəqil respublikanın süqutu nəticəsində təqiblərdən qurtularaq dünyanın bir çox ölkələrinə səpələnmiş, ömrünü qürbətdə başa vurmağa məhkum edilmiş, həm oxşar, həm də fərqli taleli məşhur azərbaycanlı siyasi xadimlərin, ədiblərin, ziyalıların ictimai-siyasi, ədəbi-bədii irsi hələ də tam aşkarlanmayıb və öyrənilməyib.
Bəzilərinin şəxsi arxivləri və ya onlara aid materialların yer aldığı digər arxivlər müxtəlif elmi mərkəzlərə, universitetlərə, muzeylərə verilib, bir çoxlarının zəngin irsi əldən-ələ düşüb, dağılıb, məhv olub, başqalarınınkı isə bu sahənin tədqiqatçılarının üzünə uzun müddət bağlı qalıb.
Bu kitab araşdırmaçı-jurnalist Dilqəm Əhmədin həmin mövzuda qələmə aldığı ikinci əsərdir. Kitabda Azərbaycan mühacirət tarixi ilə bağlı yeni sənədlər, məktublar, fotoşəkillər yer alır, mühacirlərin həyatından maraqlı fraqmentlər, yeni məlumatlar öz əksini tapır.
Məhəmmədəmin Rəsulzadə, Mirzəbala Məhəmmədzadə, Abbasqulu Kazımzadə, Əbdülvahab Yurdsevər, Məhəmmədəli Rəsulzadə, Almas İldırım, Mustafa Vəkiloğlu, Əziz Alpoud, Səməd Ağaoğlu kimi şəxsiyyətlərə aid materiallar müəllifin yeni araşdırmaları nəticəsində əldə edilib və oxuculara ilk dəfə təqdim olunur. Bütün bunlar mühacirlərin şəxsi həyatı ilə birbaşa bağlı olduğuna görə xüsusi maraq doğurur.
Kitab Azərbaycan Cümhuriyyəti tarixinin, o dövrün görkəmli şəxsiyyətlərinin həyat və yaradıcılığının tədqiqatçıları üçün unikal mənbədir.
Geniş oxucu kütləsi üçün nəzərdə tutulub.

2005-ci ildə müəllifin "Bakı neftinin itiriləcəyi təqdirdə SSRİ və Avropa faşizm qarşısında duruş gətirə bilərdimi?" adlı kitabı nəşr olunmuş, bu əsər özünə böyük oxucu auditoriyası qazanmışdı. Belə ki, kitabın elektron versiyası internet saytına yerləşdirilmiş və 2 milyondan çox ziyarətçi tərəfindən oxunmuşdu. Bundan əlavə, həmin əsərlə bağlı bir neçə internet-forum və çoxsaylı diskussiyalar keçirilmiş, müəllifin poçtuna xeyli şərh və təkliflər daxil olmuşdu.
Təqdim olunan hazırkı "Bakı nefti dünya şahmat taxtasında. 1939-1945" adlı kitab bir növ "Bakı neftinin itiriləcəyi təqdirdə SSRİ və Avropa faşizm qarşısında duruş gətirə bilərdimi?" əsərinin davamı və daha çox onun yenidən işlənmiş variantıdır.
Xatırladaq ki, bu kitabda II Dünya müharibəsinin müxtəlif aspektlərinə, ilk növbədə neftlə bağlı məsələlərə xüsusi diqqət yetirilir. Bu, II Dünya müharibəsinin əsas hadisələri kontekstində Azərbaycanın hərtərəfli rolu məsələsinə nəzər salan ilk kitabdır.
Əvvəllər məxfi saxlanılan bəzi faktlar və fotoşəkillər də kitabda təqdim olunub.

Amansız çar rejiminin təhlükəsizlik sisteminə yol tapa bilən bacarıqlı casus, cəsur inqilabçı, müdrik siyasətçi, cəsarətli maxinator, səriştəli siyasi təşkilatçı, qətiyyətli redaktor, əfsanəvi bank soyğunçusu, şair, ruhani-seminarist, ailə başçısı, qadınlarını və nikahdankənar övladlarını "uf" demədən atıb getməyə meyilli ipiqırıq məşuq...
Britaniyalı tarixçi və jurnalist Saymon Sebaq Montefiore keçmiş sovet diktatoru İosif Stalini məhz belə görür və təsvir edir.
Stalin haqda indiyədək çoxsaylı əsərlər yazılıb, onun siyasi və psixoloji portreti az qala bütün rakurslardan çəkilib. Amma adını tarixə əbədi həkk etmiş digər tiranlardan fərqli olaraq Stalinin həyatının erkən mərhələləri, uşaqlıq, yeniyetməlik və gənclik illəri barədə əsərlər çox azdır. Buna görə də Stalinin adı ətrafındakı qalın sirr pərdəsi hələ də qalır.
İosif Cuqaşvili kim idi, necə bir ailədə doğulmuş, hansı mühitdə tərbiyə almışdı? Valideynləri kim idi, şəcərəsi haqda nələr məlumdur? Onun uşaqlığı, yeniyetməliyi, gəncliyi necə keçmişdi? Küçə davalarında bərkdən-boşdan çıxmış bu çəlimsiz, amma inadkar uşaq necə oldu ki, dünyanın aparıcı qəzetlərinin manşetlərinə düşən hay-küylü bank qarətlərinin qəhrəmanına çevrildi? Sonradan ideal kommunist, "bir nömrəli" ateist kimi tanınacaq gənc İosifi ruhani olmağa vadar edən səbəblər hansılar idi? Qadınlar "Soso" deyə əzizlənən bu çılğın qafqazlının həyatında hansı yeri tuturdu? Onun əslində neçə həyat yoldaşı, sevgilisi və nikahdankənar övladı olmuşdu?
Montefiorenin çoxillik araşdırmalarının məhsulu olan "Gənc Stalin" əsərində məhz bu suallara cavab axtarılır.
Tarixçilərin, politoloq və siyasətşünasların xüsusilə böyük marağına səbəb olacaq bu kitab geniş oxucu kütləsi üçün nəzərdə tutulub.

1914-cü ildə vəliəhd Frans Ferdinandın qətlə yetirilməsindən Versal sazişinə və onun məğlub qüvvələr üçün nəticələrinə qədər baş vermiş hadisələri əhatə edən “I Dünya müharibəsinin şəkilli tarixi”

Müharibəyə cəlb olunmuş çoxsaylı millətlərin, ələlxüsus BEQ ilə birgə vuruşan kanadalılar, ANZAK və Cənubi afrikalıların əhəmiyyətli töhfələrini təsvir edir

Kitaba rəngli illüstrasiyalarla yanaşı İpr, Verden, Somma, Peşendal və Kambre kimi məşhur döyüşləri əks etdirən 250-dən artıq müasir ağ-qara fotoşəkillər əlavə edilmişdir

Qaz müharibəsi, kayzer, tank, artilleriya, əlahəzrətin “Sərkərdə” gəmisi, İrlandiya, hava döyüşləri, “Q-gəmilər” və “Luzitaniya” kimi geniş mövzularda olan məlumatlar ayrıca çərçivədə verilmişdir

Dünya tarixində baş vermiş ən böyük müharibənin müfəssəl hekayəti

300-dən artıq fotoşəkil və illüstrasiyalar

Spesifi k döyüşlər zamanı quruda, dənizdə və havada nələrin baş verdiyini göstərən 26 rəngli xəritə

Hər fəslə müxtəlif mövzularda şəkilli çərçivələr daxildir.
Mövzular: İspaniyada müharibə, Hitler, SS, Vidkun Kvislinq, Dünkerk, “Spitfayr” qırıcısı, “Messerşmitt”, Mussolini, Stalin, Sinqapurun süqutu, “U-boat” sualtı qayıqları, Afrika korpusu, “Səhra siçovulları”, Leninqradın mühasirəsi, Fransa Müqavimət Hərəkatı, “Ağ qızılgül” gizli təşkilatı, Varşava gettosunda üsyan, atom bombası və s.

Dünyanın məşhur arxivlərinin materialları əsasında yazılmış və 15 illik zəhmətin məhsulu olan bu kitabda indiyədək heç yerdə rast gəlmədiyiniz çox maraqlı faktlarla, materiallarla qarşılaşacaq, əksəriyyəti ilk dəfə dərc olunan nadir sənədlərlə, fotoşəkillərlə tanış olacaqsınız...

"Fikrimcə, bu əsər təhsil tariximizə dair Azərbaycanda indiyədək yazlmış ciddi monoqrafiyalardandır. əsərin qiymətli cəhətlərindən biri də qələmə alınmış hər fikrin inkaredilməz sənədlərlə əsaslandırılmasıdır".
Yaqub MAHMUDOV,
AMEA Tarix İnstitutunun direktoru, ANEA-nın müxbir üzvü

"Bu, ciddi elmi monoqrafiya olsa da bədii əsər kimi maraqla oxunur. Müəlliflər əslində mümkünsüz görünən bir işi gerçəkləşdiriblər-əsərdə tələbələrin hər biri haqqında ayrıca bioqrafik məlumat verilib, indiyədək əl dəyməmiş yüzlərlə arxiv sənədi üzə çıxarılıb! Azərbaycan arxivlərinə verdiyim sənədlərdən də gen-bol istifadə edilməsindən, əlbəttə, qürur duyuram".
Ramiz ABUTALIBOV,
UNESCO-nun keçmiş şöbə müdiri

"Titanik əməyin məhsulu olan bu kitabda biz yalnız 102 tələbənin taleyi ilə deyil, XX yüzilin birinci yarısındakı Azərbaycan ziyalılığının tarixi ilə də tanış oluruq".
Teymur KƏRİMLİ,
AMEA Humanitar Elmlər Bölməsinin akademik-katibi,
AMEA Əlyazmalar İnstitutunun direktoru, akademik

IV əsrdən müasir dövrədək Qubada baş verən etno-siyasi, tarixi, ideoloji, diplomatik hadisələr və regionun taleyindən keçən ədəbi-bədii, mədəni proseslər zaman axarı ilə, xronoloji ardıcıllıqla izlənilmişdir. "Quba" istilahının etimologiyasından başlamış Qubada və onun kəndlərində yaşayan əhalinin etnik tərkibi, Azərbaycanın bir parçası kimi əsrlərlə onun yaşadığı çətinlikləri bölüşərək müxtəlif sınaqlardan çıxmağı bacaran insanların yaşam tərzi, fədakarlığı, təsərrüfat və mədəni həyatının təsvirinə qədər çoxsaylı məsələlər əks olunmuşdur. Qədim və orta əsrlər dövrü, zamanın gətirdiyi xanlıqlar mərhələsi, bir-birini əvəz edən sonrakı dövrlər, xüsusilə yeni müstəqillik dövrü faktlar və sənədlərlə təsvir edilmişdir. Zaman-zaman Azərbaycana qarşı aparılmış işğalçılıq siyasətinə, ölkə ərazisinin parçalanması nəticəsində Qubanın sərhəd bölgəsinə çevrilməsinə və müxtəlif təzyiqlərə rəğmən, xalqın dövlətinə sadiq qalması, bu sədaqətin mənəvi dəyər kimi nəsildən-nəslə ötürülməsi hərtərəfli qeyd edilmişdir. Qubanın tarix və memarlıq abidələrinə xüsusi hörmət və təəssübkeşliyin təsviri olan hissələr xalqın keçmişinə bəslədiyi məhəbbətinin, bugününə diqqətinin, sabahına göstərdiyi qayğısının əyani təzahürüdür. Qubanın yetişdirdiyi layiqli, həyatda sözünü demiş şəxsiyyətlər, ziyalılar, alimlər, qəhrəmanlar, sənət adamları barədə qeydlər onları oxucuya örnək göstərmək məqsədini daşıyır. Yeri gəldikcə müəllifin öz yaradıcılığından təqdim etdiyi şeir parçaları mətnin ideya-bədii məzmununu daha da zənginləşdirmiş və onu daha oxunaqlı etmişdir. Bütün əsər boyu nadir və unikal tarixi sənəd və mənbələrə istinad edilmişdir.

Kitabda cümhuriyyət tariximizin məşhur simaları M.Ə.Rəsulzadəyə, Ə.Topçubaşova, Ə.Hüseynzadəyə, Ə.Ağaoğluna, A.İldırıma, M.B.Məmmədzadəyə, İ.Aşurbəyliyə, Ə.Cəfəroğluna, eləcə də M.Ş.Vazehdən dərs almış alman şairi F.Bodenştedtə aid olduqca maraqlı şəkil və məktublarla, Azərbaycan Parlamentinin açıldığı gün çəkilmiş nadir foto ilə, "Həyat" qəzetinin redaksiyasına, o dövrün digər məşhur təşkilatlarına, öndə gedən digər şəxsiyyətlərinə aid yeni məlumatla tanış olacaqsınız. Unikal sənədlər sayəsində bir çox bu kimi suallara da cavab tapacaqsınız:

Bakının xilaskarı Nuru paşanı kim öldürüb?
Nazim Hikməti Azərbaycanda təəccübləndirən nə idi?
Şəfiqə xanım Qaspıralı Nəsib bəy Yusifbəylinin sevgisindən niyə imtina edib?
Məmməd Səid Ordubadi Tiflis zindanında nələr görmüşdü?
Azərbaycanın ilk naşiri kim olub?
"Molla Nəsrəddin" jurnalı necə yaranıb?
Mirzə Kazımbəy niyə xristianlığı qəbul edib?
Heydər Hüseyunovu iki dəfə intihara vadar edən səbəb nə idi?
Marksı dilimizə ilk dəfə tərcümə edən Ruhulla Axundovu niyə öldürüblər?

Kitabın əsas mövzusunu Avropa Hun Xaqanlığının (370-460) tarixi təşkil edir. Hunların böyük xaqanı Attilanın həyatı, fəaliyyəti, apardığı müharibələr, Avropa xalqlarının və kilsənin ona münasibəti müqayisəli şəkildə araşdırılaraq, böyük sərkərdənin dünya tarixindəki yeri və rolu ətraflı təhlil edilib.

Hunların mənşəyi, tarix səhnəsinə çıxması Böyük Hun Xaqanlığı, hun köçləri və dövlətləri, onların siyasi, mədəni kimliyi ilə yanaşı, əsərdə Qafqaz Hun Xaqanlığı, Siyenbi, Tabqaç, Sabir və Avar dövlətlərinin tarixi də əks olunub. Azərbaycan və Şərqi Anadoluda 600 il mövcud olmuş Qarahunlar dövləti tarixşünaslıq elmində ilk dəfə bu monoqrafiyada tədqiqat obyektinə çevrilib, Azərbaycan tarixində mühüm rol oynamış albanlar, sullar, bayandurlar haqqında Çin mənbələrində yer alan tarixi faktlara özünəməxsus şəkildə işıq salınıb.

Kitab 1920-1945-ci illərdə Azərbaycan mühacirətinin siyasi tarixinə və onun təmsilçilərinin ölkəmizin və bütövlükdə Qafqazın müstəqilliyinin bərpası uğrunda mübarizəsinə həsr edilib.

Mühacirətdə olan siyasi partiya və təşkilat rəhbərlərinin o dövrdə Azərbaycanın və Qafqazın digər respublikalarının müstəqilliyinin bərpasına maraq göstərən Avropa dövlətlərinin rəsmi və qeyri-rəsmi nümayəndələri ilə qarşılıqlı münasibətinə xüsusi diqqət yetirilib.
Kitabda əksəriyyəti müəlliflər tərəfindən elmi dövriyyəyə ilk dəfə daxil edilən qiymətli arxiv materialları əsasında ozamankı Azərbaycan siyasi mühacirətinin geniş mənzərəsi təsvirolunub.

Əsəri eyni mövzulu başqa əsərlərdən fərqləndirən əsas xüsusiyyət odur ki, burada Əlimərdan bəy Topçubaşının tədqiqatçılar üçün yalnız bu yaxınlarda açılan, əhəmiyyətli sənədlərlə zəngin olan Paris arxivinin materiallarından ilk dəfə və əhatəli şəkildə istifadə edilib. Eləcə də ağır şəraitdə fəaliyyət göstərən Azərbaycanın siyasi partiya və təşkilat nümayəndələrinin Qafqazın digər xalqlarının təmsilçiləri ilə əlaqəli şəkildə çalışaraq təşkilati qurumlar yaratmağa və aktuallığını indiyədək itirməyən inteqrasiya layihələri işləyib hazırlamağa necə nail olmaları barədə ətraflı söhbət açılıb.

Əsərin sanballı mənbə kimi mütəxəssislər, müəllim və tələbələr, eləcə də tariximizin qeyd edilən dövrü ilə maraqlanan geniş oxucu kütləsi üçün son dərəcə qiymətli olacağına şübhə yoxdur.

Kitabda XIX yüzilin əvvəllərində rusların Qafqazı işğal etməsi ilə Azərbaycan mühacirətinin meydana gəlməsindən, mühacirətin 1918-ci il milli istiqlaliyyət əldə olunana qədərki mərhələsindən, 1920-ci ildə bolşevik işğalı ilə devrilmiş Azərbaycan Respublikasının müstəqilliyinin yenidən bərpası uğrunda mühacirlərin fasiləsiz olaraq 70 ilə yaxın xarici ölkələrdə apardıqları mübarizədən, ağır şəraitdən, müxtəlif ölkələrdə onlarla ictimai-siyasi təşkilatın yaradılmasından, otuzdan artıq qəzet və dərginin ərsəyə gəlməsindən, nəhayət, milli ideologiyanın daha da dolğunlaşdırılmasından bəhs olunur. Əsərdə Azərbaycanın yenidən öz müstəqilliyinə qovuşmasında mühacirətin gördüyü işlərin məzmun və əhəmiyyətinə aydınlıq gətirilmişdir.

Kitabdan ali məktəb tələbələri, müəllimləri, araşdırmaçılar, eləcə də geniş oxucu auditoriyası yararlana bilər.

Filologiya üzrə fəlsəfə doktoru Firudin Qurbansoyun "Ulduz elmi və Orta əsrlər Azərbaycan ədəbiyyatı" adlı monoqrafiyası bu mövzuda yazılmış ilk əsərdir. Əsərdə ulduz elminə dair kifayət qədər geniş məlumat verilir, onun tədqiqat sahələrinin özünəməxsusluğu araşdırılır.
Minilliklər boyunca təşəkkül tapan və təkamül edən bu elmin həm nəzəri, həm də təcrübi sahələri son illərdə inkişaf edib. Azərbaycan şairləri orta əsrlər elm və təhsil sisteminə müvafiq olaraq, ulduz elminə dair bilikləri də öyrənir, yeri gəldikcə, bundan öz əsərlərində bədii deyim vasitələri şəklində istifadə edirdilər. Ulduzlar haqdakı biliklər və onun poeziyada əksi məsələsi bu kitabda faktiki materialların bazasında təqdim olunur.
Kitabda kosmosun insanın xarakterinə, səhhətinə təsiri məsələsinə də yer ayrılıb. Geniş oxucu kütləsini maraqlandıran bir sıra məsələlər də əsərdə öz əksini tapır.
Ümid edirik ki, fars, ərəb, türk və rus dillərindəki elmi-nəzəri və praktik qaynaqlardan istifadə olunmaqla yazılan bu əsər kitab rəfinizdə layiqli yerini tutacaq.

Sağlamlıq üzrə mütəxəssis, psixoloq Kelli Makqoniqalın işi insanlara stressin öhdəsindən gəlmək və həyatlarında pozitiv dəyişikliklər etməyə kömək göstərməkdir. Ö, tələbələrinin seçimə nəzarət uğrunda apardığı mübarizəni illərlə müşahidə edəndən sonra anladı ki, insanların iradə gücü barədə inandıqlarının əksəriyyəti onların uğurlarını əslində sabotaj edir. Məsələn, iradə gücünü ləyaqət kimi görməyimiz bizi ən ciddi hədəflərimizdən yayındıra bilər.
Makqoniqal bunun əvəzində tələbələrinə özünənəzarətə təsir edən bioloji funksiyaları, əqli tələləri və sosial amilləri anlamağı təklif edir. O, psixologiya, neyrologiya və iqtisadiyyat kimi sahələrin ən son yeniliklərindən istifadə edərək Stenford Universiteti Davamlı Araşdırma Proqramı üçün "İradə gücü elmi" adlı kurs yaratdı. Tələbələr onu həyatı dəyişdirən kurs kimi təsvir edirlər. Bu kurs "İradə gücünün instinkti" kitabının əsasıdır. Bu kitab "əsl iradə gücü nədir, o necə işləyir və niyə vacibdir" suallarına cavab vermək üçün anlaşıqlı struktur qurur.
Öz diqqətimizə nəzarət etmək bacarığımız, emosiyalarımız, iştahamız və davranışımız təkcə bizim sağlamlığımıza, maliyyə təminatımıza, əlaqələrimizə və peşəkar uğurumuza təsir etmir. Onları həm də təlimləndirmək mümkündür. "İradə gücünün instinkti" məqsədlərimizi müəyyən etmək, özünənəzarəti gücləndirmək və bir ömür dəyişiklik etmək üçün bizə addım-addım irəliləməyə imkan verən proqram təqdim edir. Bu dəyişikliyin nə olmasının fərqi yoxdur: bunlar arıqlamaq, maliyyə vəziyyətinin yaxşılaşdırılması, stressin azaldılması, təxirəsalınmaların qarşısının alınması, yaxşı valideyn olmaq, yaxud da diqqətin toplanması kimi məsələlər ola bilər.

İş adamı və səyyah Fərid Novruzi dünya səyahətini uğurla başa vuran ilk azərbaycanlıdır. O, dünya səyahətinə adi vaxtda başlamayıb. Fərid 2020-ci ilin yanvar ayında uzaq səfərə çıxmağa hazırlaşanda nə özünün, nə də başqa kiminsə ağlına gəlməzdi ki, ölüm daşıyıcısı olan qorxulu bir virus ortaya çıxacaq və onun da planlarına xaincəsinə müdaxilə edərək marşrutunu gözlənilməz dərəcədə dəyişəcək. Bunun da nəticəsində səyyah sərhədlərdə çoxsaylı problemlərlə qarşılaşacaq, yük maşınında böyük məsafələr qət edəcək, boş və kimsəsiz hotellərdə gecələyəcək... 

Bütün bunlara baxmayaraq, Fərid Novruzi heç bir çətinlikdən çəkinməyərək, təhlükələrdən qorxmayaraq, öz yoluna davam edib və 158 gün ərzində təyyarədən istifadə etmədən, yalnız quru və su yolu ilə 60 min kilometrdən çox məsafə qət edib, Yer kürəsinin “başına dolanaraq” öz dünya səyahətini dünya standartlarına uyğun şəkildə uğurla başa çatdıra bilib. Bu kitab həmin səyahət vaxtı onun başına gələn olduqca maraqlı və gözlənilməz macəralardan bəhs edir. Oxucunu əvvəldən axıra qədər gərginlikdə saxlayan kitabı birnəfəsə oxuyacağınıza əminik.

Sürətlə dəyişən, resursları azalan dünyamızda problemlərin həlli və yaradıcı düşüncə bacarıqları getdikcə daha çox əhəmiyyət kəsb edir. Təhsil işçiləri uzaqgörən olmalı və gəncləri bu problemləri həll etməyə hazırlamalıdırlar. Məktəblərdə şagirdlərimizin yaradıcılıq qabiliyyətlərini inkişaf etdirməyi hədəfləsək də, eyni fəlsəfəni liderlərimizə tətbiq etmirik. Françesko Bançini bu kitabda liderlərin yaradıcı potensialdan nə dərəcədə istifadə etmələri və təhsil icmaları daxilində yaradıcı bacarıqlara diqqət yetirilməsinin təcrübəmizi necə inkişaf etdirə biləcəyi ilə bağlı konkret suallar verərək liderlik və yaradıcılıqla bağlı tədqiqatları bir araya gətirir. Dünyanın hər yerində təhsil sahəsində rəhbər vəzifə tutan şəxslər bu kitabda qaldırılan məsələlər və öz təcrübələri üzərində düşünsələr, böyük fayda əldə edəcəklər. Bu, gənclərimizi gələcəyə hazırlamaqla bağlı məsuliyyət daşıyan hər kəs üçün aktual və yeni baxışdır.