Slavyan və türk dilləri uzun illər boyunca bir-birindən ayrı surətdə, əlahiddə şəkildə tədqiq edilib. Bu kitabda isə bir-biri ilə tarixən sıx ünsiyyətdə olan iki mədəniyyətin kökləri, slavyan və türk etnoslarının qarşılıqlı əlaqədə inkişafı haqqındakı elmi-nəzəri fikirlər yer alır.
Dillərin təşəkkülünün ilkin dövrlərində qrammatik normaların birgə işlənib hazırlanmasına, leksik materialların, morfoloji sxemlərin və vasitələrin fəal qarşılıqlı mübadiləsinə dair dəyərli məlumat və mülahizələr də əsərdə öz geniş əksini tapır.
Türk və slavyan dillərinin və onların qrammatikalarının bir-birini necə tamamlaması məsələsi "Türklər tarixdən əvvəl" adlı bu kitabda elmi-konseptual cəhətdən əsaslandırılıb.
Slavyanşünasların və türkoloqların birgə çalışmalarının aktuallığı və vacibliyi problemi müəllif tərəfindən ön plana çəkilib. Ümid edirik ki, bu araşdırmalar təkcə ümumi dilçiliyin deyil, digər ictimai elmlərin də daha da inkişaf etməsinə təkan vermiş olacaq.

Kitab bütövlükdə Azərbaycanın zəngin və rəngarəng bitki aləminə həsr olunmuş, Azərbaycan dilində yazılmış ilk fundamental əsər hesab edilə bilər. Kitaba müəllifin 1970-ci ildən indiyədək apardığı tədqiqatlar nəticəsində müəyyən etdiyi 250 cinsə aid 900-dən çox yeni takson daxil edilmişdir.

Burada bütövlükdə 159 fəsilə və 1.117 cinsə aid 4.961 ali bitki növü, o cümlədən respublikamızın yabanı florasında yayılması müəyyən edilmiş 4.557 növ haqqında müfəssəl məlumat verilir.

Kitabda Azərbaycanda təbii bitən 1.500 növdən çox qida əhəmiyyətli, eləcə də dərman, efir yaglı, vitaminli, yabanı tərəvəz, boya və başqa sahələrdə istifadə oluna bilən bitkilərin arealı, faydalı xüsusiyyətləri və istifadə perspektivləri barədə biliklər, bu zəngin sərvətdən səmərəli istifadə yolları verilmişdir.

Əsər Azərbaycanın bitki aləmi, xüsusən onun yabanı biomüxtəlifliyi sahəsində çalışan mütəxəsislər, botaniklər, ekoloqlar, eləcə də ali məktəblərin biologiya, ekologiya fakültələrinin tələbələri və Azərbaycan təbiəti ilə maraqlananlar üçün dəyərli vəsaitdir.

Bu kitab Ermənistan SSR ərazisində Azərbaycan mənşəli oykonimlərin ilk tədqiqatçısı Sitarə Mirmahmudovanın (1927-1991) namizədlik dissertasiyası (1986) əsasında hazırlanmışdır. Həmin mövzu günümüzədək öz aktuallığını itirməyib. Müəllif minədək yaşayış yer adını tədqiq edərək sistemləşdirmiş, təsnifatını apararaq, toponimik xəritələr tərtib etmiş və müəyyənləşdirmişdir ki, Ermənistanda sovet hakimiyyəti qurulandan sonra, xüsusilə də 1930-cu illərdən başlayaraq, Ermənistan SSR ərazisində Azərbaycan mənşəli toponimlərin dəyişdirilməsi və onların erməni adları ilə əvəz olunması siyasəti həyata keçirilmişdir.

Sitarə Mirmahmudova yox olmaqla üz-üzə qalan xeyli sayda Azərbaycan mənşəli toponimini bir yerə toplayaraq toponimik fonda daxil etmişdir. Müəllif oykonimlərin yayılmasını qədim zamanlardan Cənubi Qafqazda məskunlaşmış türk xalqlarının tarixi ilə sıx və qırılmaz əlaqəli şəkildə araşdırmışdır. Ermənistan ərazisində rast gəlinən bir çox oykonimlərin, o cümlədən etnonimik oykonimlərin Azərbaycanda çoxsaylı paralelləri var. Bu da öz növbəsində həmin ərazinin tarixi Azərbaycan torpaqlarının, türk xalqlarının geniş yayılma arealının ayrılmaz hissəsi olduğunu bir daha sübut edir.

Doktor Qonsalesin özünün də etiraf etdiyi kimi, ana və uşağın sağlamlığında döşlə əmizdirmənin rolu və üstünlükləri ilə bağlı mübahisələr, - bu üstünlüklər onun nəzərində danılmazdır, - onu artıq çoxdandır narahat etmir. O, əmindir ki, döşlə əmizdirmə, sadəcə, uşağı sağlam böyütmək üçün adi bir vasitə və yaxud qadının özünə məhdudiyyət qoyması, övladının rifahı naminə özünü qurban verməsi deyil, onun öz həyatının, seksual və reproduktiv dövrünün normal tərkib hissəsidir. Öz növbəsində uşaq üçün adi qidalanmaq vasitəsi deyil, həm də və eyni zamanda ana ilə emosional bağlılığı formalaşdırmaq imkanıdır.
Buna görə də doktor Qonsales bu kitabı körpəsini döşlə əmizdirmək istəyən məhz belə qadınlara kömək məqsədilə tam və hərtərəfli dərslik kimi işləyib. O bu kitabda döşlə əmizdirməyə dair bir çox maraqlı mövzulara təfərrüatı ilə aydınlıq gətirib: qadının süd vəzisinin anatomiya və fiziologiyasından tutmuş uşağın çəki və boy artımınadək; əmizdirmə texnikasından tutmuş ana və uşaqlarda ən çox rast gəlinən xəstəliklərədək; döşlə əmizdirmə ilə eyni zamanda körpəyə müxtəlif qida növləri və dərmanların verilməsindən tutmuş ananın işə çıxmasının qaçılmaz olacağı təqdirdə döşlə əmizdirmənin təşkili üsullarınadək... Müəllif əmizdirmə zamanı tez-tez yaranan bir çox sualları da cavablandırır.
Doktor Qonsalesin özünün də etiraf etdiyi kimi, ana və uşağın sağlamlığında döşlə əmizdirmənin rolu və üstünlükləri ilə bağlı mübahisələr, - bu üstünlüklər onun nəzərində danılmazdır, - onu artıq çoxdandır narahat etmir. O, əmindir ki, döşlə əmizdirmə, sadəcə, uşağı sağlam böyütmək üçün adi bir vasitə və yaxud qadının özünə məhdudiyyət qoyması, övladının rifahı naminə özünü qurban verməsi deyil, onun öz həyatının, seksual və reproduktiv dövrünün normal tərkib hissəsidir. Öz növbəsində uşaq üçün adi qidalanmaq vasitəsi deyil, həm də və eyni zamanda ana ilə emosional bağlılığı formalaşdırmaq imkanıdır.
Buna görə də doktor Qonsales bu kitabı körpəsini döşlə əmizdirmək istəyən məhz belə qadınlara kömək məqsədilə tam və hərtərəfli dərslik kimi işləyib. O bu kitabda döşlə əmizdirməyə dair bir çox maraqlı mövzulara təfərrüatı ilə aydınlıq gətirib: qadının süd vəzisinin anatomiya və fiziologiyasından tutmuş uşağın çəki və boy artımınadək; əmizdirmə texnikasından tutmuş ana və uşaqlarda ən çox rast gəlinən xəstəliklərədək; döşlə əmizdirmə ilə eyni zamanda körpəyə müxtəlif qida növləri və dərmanların verilməsindən tutmuş ananın işə çıxmasının qaçılmaz olacağı təqdirdə döşlə əmizdirmənin təşkili üsullarınadək... Müəllif əmizdirmə zamanı tez-tez yaranan bir çox sualları da cavablandırır.

Pəhriz
Arıqlamaq üçün əyləncəli bələdçi

Doktor Dukanın yaratdığı metodu fransızlar artıq həyatlarına daxil edib. Arıqlamaq üçün nəzərdə tutulmuş bu metod getdikcə mədəniyyətlərlə çulğaşır, sərhədləri aşır.
Metod 72-si protein, 28-i bitki mənşəli olmaqla, istədiyiniz qədər yeyə biləcəyin 100 təbii qidadan ibarətdir.
Doktor Dukan bütün qidaların tərkibini, onların pəhriz zamanı rolunu və xüsusiyyətlərini bir-bir araşdıraraq, sizə ləzzətli və orijinal ərzaqlardan ibarət resept təklif edir.
Artıq çəkidən qurtulmaq üçün nəzərdə tutulmuş 100 qidadan ibarət bu pəhriz ömrünüz boyu süfrənizdə bol olacaq. Onlardan istifadə etməyi, onları sevməyi, hazırlamağı və bu ləzzəti övladlarınıza ötürməyi öyrənin.
Doktor Pyer Dukan

30 ildən artıqdır ki, qida mühəndisi kimi fəaliyyət göstərən Pyer Dukan qidaların tərkibi və onların yenidən öyrənilməsi üzrə ixtisaslaşıb.

"Nə qədər çox yesəniz, bir o qədər arıqlayarsınız".
Doktor Pyer Dukan

Şəkərli diabet nədir? Ket Feliks və Oliver Lukas bu suala əlinizdəki kitabda cavab axtarıb. Dəyərli məlumatlarla zəngin olan bu əsərdə alternativ təbabətin populyar təbii müalicə metodlarından söz açılır.

Oxucu bu kitab sayəsində şəkərli diabetlə yaşayan insanların normal həyat tərzini necə qoruyub saxlamalı və hansı qida rasionundan bəhrələnməli olduğunu müəyyən edəcək, bu mərəzə düçar olmamaq üçün ən son tibbi üsullardan xəbərdar olacaq. Nəticədə daha rahat həyat tərzi qaydaları haqda məlumatlanacaq.

Dünya mətbəxinin ən sağlam təamlarının hazırlanma qaydaları bu kitabda aydın və izahlı şəkildə, müvafiq fotoların müşayiəti ilə təqdim edilir. Kitabı oxuyun və sağlam yaşamağın yollarını öyrənin!

Əsrlər boyu İslam dünyası Yer üzünün ən böyük, ən tolerant, ən qabaqcıl, ən novatorçu və ən güclü sivilizasiyası olub. Və birdən hər şey dəyişdi. Əvvəllər xor gördükləri Qərb dünyası müsəlmanları əvvəlcə döyüş meydanında, sonra bazarda, daha sonra isə sosial-ictimai həyatın bir çox sahələrində, hətta şəxsi həyatda belə ard-arda məğlubiyyətə uğratdı. Bernard Lyuisin bu kitabı dəyişikliyə anlam verməyə çalışan İslam dünyasının hüznlü reaksiyasından söhbət açır və xaosa yuvarlanan mədəniyyətin mükəmməl təsvirini verir. Yaxın Şərqdə bir çoxları “Bunu bizə kim etdi?” sualını deyil, “Biz harada səhvə yol verdik?” sualını ön palana çəkdiyi halda digərləri məğlubiyyətin səbəbini daxili və xarici faktorlarla əlaqələndirərək “günah keçisi” axtarışına çıxdılar. Kitabda sadalanan faktlar və gəlinən nəticə günümüz üçün də aktualdır.

TARİXİN ƏN UNUDULMAZ DÖVRLƏRİNDƏ DÜNYAYA HÖKM EDƏNLƏR – TÜRKLƏR “Türkiyənin əsrlər əvvəl açılan tarix kitabı hələ bağlanmayıb. Bu gün də əmin oluruq ki, bu kitab bağlanmayacaq. Ona görə də tarixi bilməyə, haradan gəldiyimizi, necə yurd-yuva qurduğumuzu öyrənməyə məcburuq. Keçmişini bilməyən, yaddaşı olmayan cəmiyyətlər hara gedəcəyini, başına nələrin gələcəyini, hətta nələr edə biləcəyini anlaya bilməz”.

İlbər Ortaylı

Türklər XIV-XVII əsrlərdə Hindistandan Vyana qapılarına qədər çox geniş ərazilərdə hökmranlıq etdilər. Orta Asiyanın, Qafqazın, Yaxın Şərqin və Avropanın tarixini formalaşdırdılar. Qələbə çalmağın mümkün görünmədiyi bir çox döyüşlərdən qeyri-adi hərbi taktikaları sayəsində zəfərlə çıxdılar... Hansı qitədə olmalarından asılı olmayaraq, ölkələri ədalətlə idarə etdilər. Problemlərini həll edə bilməyən Avropa ölkələrinə öz ideyaları ilə ilham verdilər. Dünyanın hər yerində memarlıqdan musiqiyə, ədəbiyyatdan təbabətə qədər silinməz iz qoydular. Bir çox dövlətlər qurdular – Teymurilər, Qızıl Orda, Məmlüklər, Osmanlılar... Əfsanəvi hökmdarları oldu – Əmir Teymur, Fateh Sultan Məhmət, Sultan Baybars, Qanuni Sultan Süleyman, Babur şah... İlbər Ortaylı Asiyanın düzənliklərindən Avropanın mərkəzinə qədər irəliləyən, dünya tarixinin zirvəsində taxt quran türklərin möhtəşəm çağından bəhs edir…

Rusiya tarixində ən əlamətdar hadisənin - çarizmin devrilməsinin mahiyyətini anlamaq üçün sonuncu çar II Nikolayın (1868-1918) bioqrafiyası çox mühüm mənbədir.
Nikolay 26 yaşında taxta çıxıb. O, nə qədər vicdanlı, dürüst və vətəninə bağlı insan olsa da, bir o qədər də zəif, mövhumatçı və qətiyyətsiz biri idi. Zəif xarakterli birinin minbir çətinliyə və təzyiqlərə rəğmən 23 il taxtda qalması əslində möcüzə idi. Lakin bütün çatışmazlıqlarına rəğmən Nikolayın müsbət cəhətləri də az deyildi. Müasirlərindən fərqli olaraq, biz Nikolayın məşəqqətli şəxsi həyatından xəbərdarıq. Onun bəzi səhvlərini bağışlamaq bizim üçün bəlkə də elə buna görə asandır. Bəzilərinin nəzərində Nikolay sadəcə bir əbləhdir, başqaları isə onu qandan doymayan bədheybət kimi təsəvvür edir. Lakin çoxlarının nəzərində o, məhdud imkanlar çərçivəsində mütərəqqi ideyaları həyata keçirməyə çalışan ədalətli hökmdar və qızıl qəlbli insan olaraq qalır.
O, ailəsinə çox bağlı idi. Nikolayla Aleksandranın izdivacı sevgi üzərində qurulmuşdu. Sevgilərinə də ömürlərinin sonuna kimi sadiq qaldılar. Onların dörd qızı var idi. Nikolayın yeganə oğlu - imperiya ailəsinin və bütün Rusiyanın böyük ümid bəslədiyi uşaq irsi xəstəlik səbəbindən əlil idi. Çareviçin xəstəliyi Rusiyadan və dünyadan uzun müddət gizlədilmişdi. Məhz oğlunun sağalmaz xəstəliyə mübtəla olması fırıldaqçı Rasputinin imperiya ailəsinə ayaq açmasına şərait yaratmışdı. Bu isə Romanovlar sülaləsinin süqutunu tezləşdirdi.
Bu kitabda hər şeydən - eşq-məhəbbətdən, faciədən, yüksəlişdən, süqutdan, cah-calaldan, səfalətdən, bəşər övladının acizliyindən, Rusiyanı, eləcə də bütün dünyanı silkələyən, təkcə çar üsul-idarəsini məhv etməklə kifayətlənməyib Avropa monarxiyalarının parlaq dövrünə son qoyan qlobal fəlakətdən bəhs edilir.

Oxuculara təqdim olunan bu topluda Azərbaycan Xalq Cümhuriyyətinin banisi Məmməd Əmin Rəsulzadənin bir sıra məktubları, eləcə də onun 1934-cü ildə İstanbulda işıq üzü görmüş "Şəfibəyçilik" adlı əsəri latın qrafikası ilə Azərbaycan dilində ilk dəfə nəşr edilir. Kitabın "Məktublar" adlı birinci bölümündə M.Ə.Rəsulzadənin müxtəlif illərdə Əlimərdan bəy Topçubaşova və Ceyhun bəy Hacıbəyliyə ünvanladığı məktublar toplanıb. Həmin məktubların bir hissəsi Topçubaşovun Parisdə saxlanan şəxsi arxivindən götürülüb. M.Ə.Rəsulzadənin Azərbaycan mühacirətinin digər nümayəndəsi Şəfi bəy Rüstəmbəylinin 1933-cü ildə İstanbulda nəşr edilmiş "Yıxılan bütlər" kitabına cavab olaraq yazdığı "Şəfibəyçilik" əsəri isə həmin illərdə Azərbaycan Milli Məclisi daxilində baş verən fikir ayrılıqlarına həsr olunub.
Kitabda yer alan bütün bu sənədlər həm Rəsulzadə irsinin, həm də XX əsrin 20-30-cu illərində Azərbaycan siyasi mühacirəti daxilində baş vermiş proseslərin öyrənilməsi baxımından xüsusi əhəmiyyət kəsb edir.

Biznes mühiti, missiya və əsas kompetensiyalar haqqında məchul fərziyyələr sizin biznesə zərər verə bilər. Bu fikirlər müasir menecmentin “xaç atası” Piter F. Drukerin məqaləsində yer alır. Biznes nəzəriyyəsi aydın və hərtərəfli olmalıdır. Siz fərziyyələrinizi mövcud reallığa uyğun şəkildə yeniləməlisiniz. Bu fərziyyələr eyni zamanda bütün təşkilat üçün aydın və yerinə yetirilə bilən olmalıdır. Fərziyyələrinizin sınaqdan keçirilməsi heç vaxt bitməyən bir prosesdir, amma çox vacib prosesdir. Doğrudur, rəhbərlər möcüzəvi xəyallar qurmalıdırlar, lakin onlar eyni zamanda biznesə yönəlik dəqiq, ardıcıl, aktual nəzəriyyəyə də malik olmalıdırlar.

Müasir menecmentin atası hesab olunan Piter F. Druker özünün 65 illik müşavir karyerası dövründə istənilən rəhbərin fəaliyyətini səmərəli edə biləcək 8 təcrübəni müəyyənləşdirib. Druker hesab edir ki, liderlik heç də xarizmaya malik olmaqla və ya ekstravert olmaqla bağlı bir şey deyil. Hər şey düzgün yanaşmadan asılıdır. Effektiv liderlər özlərinə bu sualları verirlər: “Nə edilməlidir?”; “Müəssisə üçün ən doğru yol hansıdır?” Belə liderlər fəaliyyət planları hazırlayırlar. Onlar qərarların qəbul edilməsinə görə məsuliyyəti öz üzərlərinə götürürlər. Onlar kommunikasiyaya görə məsuliyyəti öz üzərlərinə götürürlər. Onlar problemlərə deyil, fürsətlərə fokuslanırlar. Onlar məhsuldar görüşlər keçirirlər. Onlar “Mən” yox, “Biz” deyirlər.

2010-cu ilin yazında Harvard Biznes Məktəbinin buraxılış sinfinin məzunları HBS professoru Kleyton Kristensendən onlar üçün çıxış etməsini xahiş etdilər. Lakin məzunlar professorun müdrik fikirlərini HBS-dən sonrakı iş həyatlarında tətbiq etmək üçün yox, onlardan gələcəkdə öz həyatlarında istifadə etmək üçün dinləmək istəyirdilər. Professor öz həyatının amalını başa düşməkdə ona köməklik edən bir sıra rəhbər prinsipləri məzunlarla bölüşdü, nəticədə klassik əsərə çevrilmiş həmin bu məqalə araya-ərsəyə gəldi. Kristensenin müdrikliyi onun dərin dini baxışlarına əsaslansa da, bu strategiyalardan hər kəs öz həyatında istifadə edə bilər.

Rəhbərlər öz işçilərindən ən yaxşı nəticələri əldə etmək üçün hansı dəyişiklikləri etmək lazım olduğunu çox vaxt bilmirlər. İşçinin mövcud potensialı ilə onun reallaşdırılmış istedad və enerjisi arasındakı uçurum böyükdür. “Gallup” İnstitutuna görə, işçilərin 70 faizi işə bağlı deyil. Bestsellerə çevrilmiş “mavi okean” strategiyasının müəllifləri məhz belə hallar üçün həll yolu təklif edirlər. Onlar təşkilatın hər bir səviyyəsində işçilərin maksimum potensialından istifadə etmək üçün lazım olan addım və prosesləri açıqlayırlar. Şirkətlər həvəssiz işçiləri həvəsli işçilərə çevirmək üçün “mavi okean” liderliyi təlimatından istifadə etsələr, onların nəticələri möhtəşəm olacaq.

Rəhbərlərin əksəriyyətinin böyük, möhtəşəm, tükürpərdici məqsədləri var. Lakin rəhbərlər elə bürokratik maneələr yaradırlar ki, bu onların məqsədlərini reallaşdırmasına mane olur. Cim Kollinz bu kitabda katalitik mexanizm – sadə, lakin güclü idarəetmə vasitəsi təqdim edir ki, bu da ali məqsədləri reallığa çevirməyə kömək edir. Məqsədlərlə nəticələr arasında vacib bir əlaqə vasitəsi olan bu alət eyni zamanda bu məfhumların birini digərinə çevirə bilən stimullaşdırıcı, qeyri-bürokratik vasitədir. Lakin bir təşkilatda uğurla işləyən eyni katalitik mexanizm digərində işləməyə bilər. Ona görə də Kollinz oxuculara bələdçilik etmək üçün məqsədləri reallaşdırmağa kömək edən effektiv mexanizm qurmağın ümumi prinsiplərini təqdim edir.

Mövcud bazarlarda rəqabət aparmaq getdikcə daha az gəlir vəd edir, buna görə də şirkətlər yeni bazarlar yaratmağın yollarını tapmalıdır. Lakin böyük investisiyalara və zəhmətə baxmayaraq, yeni bazarlar yaratmaq şirkətlər üçün olduqca çətindir. Onlar qazanc əldə etmək əvəzinə çox vaxt “qırmızı okean tələsi”nə düşürlər. Bestseller müəllifləri U.Çan Kim və Rene Moborn məsləhət görürlər ki, rəhbərlər köhnə bazarlarda tələyə düşməmək və öz “mavi okean”larını tapmaq üçün:

• yeni müştəriləri cəlb etməyə yönəlməlidirlər

• seqmentləşdirməyə çox əhəmiyyət verməməlidirlər

• yeni bazar yaratmağın heç də həmişə texnoloji innovasiya və ya köhnəni məhv etmək demək olmadığını anlamalıdırlar

• “ya premium, ya da ucuz” yanaşmasından çəkinməlidirlər

Kitabda Azərbaycan Cümhuriyyəti və Azərbaycan siyasi mühacirəti ilə bağlı ilk dəfə üzə çıxarılan materiallar toplanıb. Bu materiallar müəllifin Türkiyənin İstanbul, Ankara, İzmir şəhərlərindəki kitabxanalarda, arxivlərdə çalışması nəticəsində əldə edilib, bəziləri isə ayrı-ayrı kolleksionerlərdən satın alınıb.
Burada oxucular Azərbaycan Cümhuriyyətinin hökumət və parlament üzvlərinin, eləcə də bolşevik işğalı nəticəsində qürbətdə yaşamağa məcbur olan digər ictimai-siyasi xadimlərin mühacirət həyatı ilə bağlı yeni məlumatlarla, Məhəmmədəmin Rəsulzadə, Məhəmmədsadıq Aran, Əhməd Həmdi Qaraağazadə, Xəlil bəy Xasməhəmməd, Miryaqub Mirmehdizadə, Abbasqulu Kazımzadə, Mirzəbala Məhəmmədzadə, Xosrov Sultanzadə, Məhəmməd Altunbay və başqaları haqqında maraqlı məqalələrlə tanış olacaqlar.
İstanbulda yerləşən, Cümhuriyyət xadimlərinin əksəriyyətinin dəfn olunduğu Fəriköy İslam məzarlığı haqda məlumatlar, orada dəfn edilən azərbaycanlı mühacirlərin siyahısı, onlar barədə unikal bilgilər ilk dəfə işıq üzü görür. Kitabda müəllifin mühacirlərin ailə üzvlərindən aldığı müsahibələr də yer alır. Təqdim olunan fotoşəkillərin əksəriyyəti müəllifin şəxsi kolleksiyasındandır.

Həsən Həsənovun oxuculara təqdim olunan "Birinci respublikaya aparan yolda" kitabı Azərbaycan və bütün müsəlman dünyası tarixində ilk demokratik respublikanın müstəqilliyinə gedən yolunu və yaranması prosesini əks etdirir. Müəllif bu çətin və əzablı yolun mərhələlərini dəqiqlik və ardıcıllıqla təsvir edir. Kitabdan aydın görünür ki, "müstəqillik" şüarı birbaşa yaranmayıb, "mədəni", "mədəni-milli", "milli-ərazi" muxtariyyət ideyalarından müstəqil respublika üsuli-idarəsinə qədər inkişaf edərək müəyyən təkamül yolu keçib.
Kitabda Rusiyada mütləqiyyətin devrilməsindən sonrakı proseslərdə, xüsusilə də xalqların milli-azadlıq hərəkatı ilə bağlı hadisələrdə Azərbaycanın vacib rol oynadığı əsaslı şəkildə izah olunur. Müxtəlif mənbələrdən alınmış bir çox yeni faktlar göstərilir. Müəllif eyni zamanda müxtəlif tarixi hadisələrin şərhində tamamilə gözlənilməz yanaşma nümayiş etdirir.
Kitab mütəxəssislər və geniş oxucu kütləsi üçün nəzərdə tutulub.

Həsən Həsənovun təqdim olunan "Bakı tanrıçılıq kompleksi" monoqrafiyası Bakı bütpərəstlik kompleksinin, Bakı Qız qalasının, Qobustanın nadir qayaüstü təsvirləri kompleksinin hərtərəfli fənlərarası tədqiqinə ilk cəhddir. Əsərdə Bakı bütpərəstlik kompleksinin bir çox gizli mənalarının açıldığını etiraf etməyə əsas verən tamamilə yeni konsepsiya təqdim olunur. Bu kitabda qədim Bakının sakrallığı, Bakı bütpərəstlik kompleksinin formalaşdırılma prinsipləri, İçərişəhərdə skiflərin bütpərəst tenqirliklərinin iyerarxik yerləşməsi, onların zahiri görünüşü, adları haqqında tamamilə yeni informasiyalar verilir.
Əsərdə Misir arxeologiyası üzrə aparıcı tədqiqatçıların qədim Misir mənbələrində Bakının adının çəkilməsi barədə unudulmuş məlumatları canlandırılır, Bakı bütpərəstlik kompleksinin planiqrafiyasında ulduz bürclərinin canlandırılması barədə məlumat verilir. Polisemantik etimologiya və linqvistik arxeologiya metodları burada xüsusi qeyd olunmalıdır, çünki müəllif onların köməyi ilə Bakının, Bakı Qız qalasının, həmçinin çoxsaylı toponim və antroponimlərin şifrini açır.
H.Həsənovun əsərinin yalnız tarix, memarlıq elmləri və sənətşünaslıq üçün deyil, həm də humanitar elmlər üçün əhəmiyyətini tam dəyərləndirmək olduqca çətindir. Çünki qədim Azərbaycan mədəniyyətinin dünyagörüşü və etnik zəmini haqqında məsələ ilk dəfə onun tərəfindən qoyulub və həll edilib.
Təqdim olunan kitab müəllifin "Qız qalası" əsərinin dördüncü nəşridir. İlk iki nəşr rus dilində olub, üçüncü nəşr ingilis dilində UNESCO tərəfindən həyata keçirilib. Hazırkı nəşr Azərbaycan dilində birincidir. Bu nəşrin əvvəlkilərdən fərqi kitabın iki cilddə olmasındadır. Bu səbəbdən əsərdə onun məzmununa xələl gətirmədən cüzi struktur dəyişiklikləri edilib. Əsərin iki cilddə çap olunması tədqiqatın iki yaxın, amma müstəqil mövzuları əhatə etməsi ilə bağlıdır. Birinci cild məşhur "Bakı Qız qalası"na, ikinci isə hazırkı Bakı şəhərinin öz başlanğıcını götürdüyü, çox az məlum olan, lakin izləri qalan "Bakı tanrıçılıq kompleksi"nə həsr olunub.
Kitab həm mütəxəssislər, həm də geniş oxucu kütləsi üçün nəzərdə tutulub.