Monoqrafiyada əsasən son 25 ildə çəkilmiş Azərbaycan filmlərində sənətkarlıq məsələləri, Qarabağ münaqişəsinin bədii filmlərdə təcəssümü, keçid dövründə yeni axtarışlar, modernist kinoya doğru atılan ilk addımlar, vətənpərvərlik və vətəndaşlıq məsələlərinin ekranda canlandırılması kimi problemlər araşdırılır.

Müstəqillik illərində Azərbaycanda çəkilmiş, demək olar ki, bütün kinofilmlər əsərdə geniş təhlil olunur. Kitabda az qala hər bir ekran əsəri, oradakı personajların xarakteri ayrı-ayrılıqda araşdırılır, obrazlar təhlil olunur, ssenarist, rejissor və operatorların, aktyorların, ümumiyyətlə, bütün yaradıcı heyətin işi ciddi tənqid süzgəcindən keçirilir.

Əsər müstəqillik dövrü Azərbaycan kinosunun "Yarasa", "Güllələnmə təxirə salınır", "Sonuncu dərviş", "Ovsunçu", "Qisas almadan ölmə", "Haray", "Yaddaş", "Fəryad", "Hər şey yaxşılığa doğru", "Yalan", "Əlvida, cənub şəhəri", "Arxada qalmış gələcək", "Dolu", "Nabat" və daha neçə-neçə nümunələri əsasında aparılmış ilk elmi araşdırmaların məhsuludur.

Azərbaycan milli teatrının keçdiyi tarixi inkişaf yoluna, onun müxtəlif problemlərinə, janr özəlliklərinə, estetik səciyyəsinə həsr olunan "Azərbaycan teatrı" kitabı müəllifin çoxillik fundamental araşdırmalarının məhsuludur. Teatrşünas-tənqidçi, sənətşünaslıq doktoru, professor İlham Rəhimli bu əsərində meydan teatrından, xalq oyun-tamaşalarından, şəbihlərdən tutmuş peşəkar teatrlarımızın çağdaş dövrə qədərki yaradıcılıq yolunu təhlil süzgəcindən keçirib.

Müəllif Azərbaycanda teatrın tarixinin çox qədim olduğunu, onun mənbəyinin hətta antik dövrlərə - eramızdan əvvəl VIII-VII minilliklərə, Qobustan qayaüstü təsvirlərinə gedib çıxdığını bəyan edir. Qayaüstü təsvirlərdəki yallıyabənzər kollektiv rəqs elementlərini kütləvi meydan tamaşalarının təkzibolunmaz dəlili hesab edən tədqiqatçının qənaətinə görə, bu oyun-tamaşalar tarixin sonrakı dönəmlərində daha da təkmilləşmiş, dolğunlaşmış, yeni məzmun almış və çağdaş teatr mədəniyyətinin formalaşması üçün möhkəm zəmin yaratmışdır.
VIII hissədən ibarət olan araşdırmada peşəkar teatrın təşəkkül və inkşaf mərhələləri ətraflı şəkildə işıqlandırılır. Peşəkar Azərbaycan teatrının sürətli inkişaf yolu keçdiyini, zəngin mədəni irs yaratdığını xüsusi vurğulayan müəllif istər paytaxt Bakıda, istər bölgələrdə, istərsə də Azərbaycanın hüdudlarından kənarda (İrəvan, Tiflis, Dərbənd, Aşqabad və s.) fəaliyyət göstərmiş və hazırda da fəaliyyət göstərməkdə davam edən milli sənət ocaqlarının özünəməxsus xəritəsini çəkir. Bu kitabda Azərbaycan milli teatr kollektivlərinin istisnasız olaraq hamısı barədə, onların tarixi, repertuarı, keçdiyi yol, bu sənət məbədlərində çalışan müqtədir sənətkarlar haqda müfəssəl məlumat verilir, onların fəaliyyəti təhlil olunur.
"Azərbaycan teatrı" kitabı mədəniyyət tarixini öyrənənlər, sənətşünaslar, incəsənət xadimləri, milli səhnə sənətimizlə maraqlanan geniş oxucu kütləsi üçün nəzərdə tutulub.

Azərbaycanın xalçaçılığı, muğamı və zəngin memarlıq irsi ilə yanaşı orta əsrlər Azərbaycan incəsənətinin ən parlaq səhifələrindən olan XIV-XVI əsrlər Təbriz miniatür boyakarlığı nəinki orta əsrlər müsəlman sivilizasiyasını, hətta bütün dünya incəsənətini misilsiz dərəcədə zənginləşdirib. Təbriz miniatürləri təkcə Azərbaycanın orta əsrlər incəsənətinin zirvəsi deyil, həm də dünya mədəniyyəti tarixinin ən parlaq səhifələrindən biridir. Bu monoqrafiyada Təbriz rəssamlarının dünyanın ən böyük muzey və kitabxanalarında saxlanılan və bəşər mədəniyyəti xəzinəsinin qızıl fonduna daxil edilən əsərlərindən bəhs olunur. Müəllif əvvəllər haqqında çox səthi və qısa məlumat verilmiş XIV əsr rəssamları Əhməd Musa, Şəmsəddin Təbrizi və Əbd əl-Xayy kimi dahi sənətkarların yaradıcılığını, habelə XV əsr Qaraqoyunlu və Ağqoyunlu dövlətləri zamanındakı unikal əsərləri daha dərindən tədqiq edib, Səfəvilər dövrü miniatür məktəbi tarixini xeyli yeni materialla zənginləşdirib. Bu kitabda verilmiş illüstrativ materiallar da yenilənib. Tədqiqat işində Türkiyə, Qərbi Avropa ölkələri və Rusiyadakı zəngin kolleksiyalardan istifadə olunub.

Azərbaycan müasir incəsənət səhnəsi dinamik və inkişaf edən icmadan ibarətdir. Bu təmayülün yarandığı 90-cı illərdən bugünədək azərbaycanlı rəssamlar həm ölkə hüdudları daxilində, həm də qlobal icmanın bir hissəsi kimi azərbaycanlı olmağın nə olduğunu araşdırmaq məqsədilə incəsənətin rəssamlıq, heykəltəraşlıq, performans, instalyasiya, video-art və fotoqrafiya kimi müxtəlif sahələrində fəaliyyət göstəriblər. İncəsənət sahələrinin və Azərbaycan rəssamlarının konseptual istiqamətlərinin müxtəlifliyini nəzərə alaraq onları monolit hərəkat kimi müzakirə etmək çətindir. Həmçinin hər rəssam əsərlərinə öz hisslərini qatır. Bu da onların çağdaşları ilə müqayisədə, rəssamları öz ağuşuna alan daha geniş mövzuları təqdim edir. Azərbaycan nisbətən yaxın zamanda Sovet İttifaqının asılılığından azad olduğuna görə ölkənin incəsənəti mahiyyət etibarilə fərdi təcrübə prizması vasitəsilə identiklik və mədəniyyətin ifadəsidir. Bu kitab məhz qeyd edilən hekayələrin müxtəlifliyini nümayiş etdirir. Bununla yanaşı, öz yanaşmasında ensiklopedik olmağa çalışmasa da, Azərbaycanda və diasporada yaradıcılıqla məşğul olan görkəmli rəssamlardan bir neçəsini oxuculara təqdim edir. Kitab oxucuya nəyin Azərbaycan incəsənətini bu qədər cəlbedici etməsini öyrənmək üçün bir dəvətdir. Azərbaycan incəsənəti öz məkanını və zamanını əks etdirsə də, dünya tarixinin bir hissəsi sayılır. Bu kitabda qeyd edilən bütün rəssamlar yerli və qlobal ideyanı əhatə edərək Azərbaycan incəsənətini daha geniş kontekstdə ortaya qoyur.

İlk dəfədir ki, bu rəssamlar bir araya toplanır, onların bioqrafiya və praktikaları barədə qısa məlumat verilir. Daha vacib məqam odur ki, kitabda əsas diqqət rəssamların əsərlərinə verilib. Bu əsərlərdəki incəsənəti təsvir etmək üçün isə sözə ehtiyac yoxdur. Kitabın müəllifləri və redaktorları ümid edir ki, bu nəşr bu günün dünyasında incəsənət aləminin ən heyranedici və aktual sahələrindən biri sayılan Azərbaycan müasir incəsənəti ilə bağlı tədris hərəkatına mühüm töhfə verəcək.