Miçio Kaku

Miçio Kakunun "Gələcəyin fizikası" kitabı gələcək haqqında inanılmaz yeniliklərlə doludur.

2100-cü ildə dünya necə olacaq? Kompüterlər bircə sözlə necə idarə
ediləcək? İnsan təfəkkürün gücü ilə əşyaları necə hərəkətə gətirəcək? Biz
dünyanın bütün informasiya sahələrinə necə qoşulacağıq? Ümumiyyətlə,
bu, mümkündürmü?

Hətta bundan çətini də mümkündür. İnanmırsınız,
mütəxəssislərin fikirlərini nəzərdən keçirin. Süni orqanlar... Havada bərq
vuran avtomobillər... Həyat və cavanlığın inanılmaz davamlılığı... Bütün bu
möcüzələr fantastika deyil. Ciddi alimlərin elmi cəhətdən əsaslandırdığı
proqnozlarıdır. Müəllif bu kitabda həmin alimlərlə müsahibələrini ümumiləşdirərək
təqdim edir. Oxucunun gözləri qarşısında sirli-sehrli bir reallıq
canlanır.

E.L Ceyms

«Azadlığın əlli çaları» – E.L. Ceymsin bestseller olmuş məşhur trilogiyisanın son romanıdır. Son hissədə Anasteyşa öz sevgilisini daha yaxından tanıyacaq. Kristian isə öz qısqanclığını ram etməyə çalışır. Onlar bir yerdə Monakoya, səyahətə çıxırlar. Monte-Karlo çimərliyində Kristian Anasteyşaya evlənmə təklif edir və o...

Paulo Coelho Aldatma

Jurnalist Linda otuz yaşını təzə keçib. Sevən əri, gözəl uşaqları, yaxşı sənəti var. Yaşamaq və həyatdan zövq almaq üçün bir qadına daha nə lazımdır? Ona yalnız həsəd aparmaq olar. Amma Lindanın içində bir boşluq var, hiss edir ki, günlər keçdikcə uzun illər ərzində qurduğu həyata marağını itirir. Həvəssiz, süst günlər davam edir. O isə xoşbəxtliyi hər gün duymaq istəyir. Ərli qadının əzablı seçimi, məktəb illərinin sevgisinə yenidən qovuşmaq ehtirası, qapını döyən ailə böhranı, İsveçrənin möhtəşəm təbiəti fonunda yeknəsəq həyat və bundan qurtulmaq həvəsi. Adi, gündəlik həyat, “İsveçrə saatı” kimi dəqiq, az qala ehkama çevrilmiş həyat onu bezdirir, tənhalığa, depressiyaya qapılır.

Linda məktəb yoldaşı Yakoba rast gəlir. İndi siyasətçi və deputat olan Yakobdan müsahibə alır və elə bu zaman Linda başa düşür ki, onun həyatında çatışmayan sevgi və ehtirasdır.

İncə düşünülmüş plan - Sidney Sheldon

Toy hazırlıqlarına başı qarışmış Lesli Styuart hamı kimi xoşbəxt həyat yaşayırdı. Onun uğurlu işi, gözəl həyatı, əsrarəngiz sevgisi var idi. Ta ki nişanlısı onu qəfildən atıb senatorun qızı ilə evlənənədək!

Bəs hər şey bircə bu xəyanətlə bitirmi? 

Xeyr!

Lesli Styuartın yaddaşlarda iz qoyacaq inanılmaz qisas planı var!

Fyodor Mixayloviç Dostoyevskinin XIX əsrin 60-cı illərində (1866) meydana gələn "Cinayət və cəza" romanı rus milli, mədəni, ictimai tarixinin mürəkkəb dövrlərindən birini əks etdirir. Bu elə bir dövr idi ki, Rusiya təhkimçilik hüququndan təzəcə azad olmuş və hələ özünün gələcək inkişaf yollarını dəqiq müəyyənləşdirməmişdi. Rusiya hansı yolla gedəcəkdi? O, Avropa kapitalist inkişaf yolunu seçəcək, yoxsa öz milli ənənələrinə əsaslanaraq yeni, Avropa xalqlarından fərqli bir yolla gedəcəkdi? Bu sualların dəqiq və birmənalı cavabı yox idi və 60-cı illər rus ədəbiyyatı bu məsələ haqqında dərindən düşünürdü. Dostoyevski Çernışevskidən fərqli olaraq Rusiyanın gələcək nicatını inqilabda və ədalətli sosial quruluşda, yəni sosializmdə deyil, xalqın, millətin rus pravoslav dininə tapınaraq mənəvi kamilləşmə yolunu seçməsində görürdü. O dövr üçün Çernışevskinin fikirləri daha aktual, daha real görünürdü. Rusiya nəhayət ki, müəyyən müddətdən sonar sosializm deyilən məqsədə nail oldu. Lakin geniş tarixi kontekstdə Dostoyevski fikirləri həqiqətə daha yaxın idi, çünki onlar rus milli ruhunun, milli xarakterinin, milli mədəniyyətinin əsaslarını və dərin təmayüllərini daha dürüst ifadə edirdi. Bugünkü nöqteyi-nəzərindən diqqət yetiriləndə Dostoyevskinin fikirlərinin özünü doğrulduğunu görürük. 

Bəs, “emosional zəka” nədir? Onu ölçmək olarmı? “Adi” zəka “emosional” zəkadan nə ilə fərqlənir? Keşməkeşli həyat yollarında “adi” zəkalı insan “emosional” zəkaya sahib insandan nə üçün geri qalır? Kədərin, qəzəbin, depressiyanın, qorxunun, həyəcanın, stressin, utancaqlığın, bədbinliyin öhdəsindən necə gəlmək və uğur qazanmaq olar? Bu və digər mühüm suallara cavab tapmaq istəyirsinizsə, məşhur psixoloq, emosional zəka nəzəriyyəsinin banilərindən biri Daniel Golemanın qələmindən çıxmış bu kitabı oxuyun. Emosional zəka” kitabı yalnız tələbələr və müəllimlər üçün deyil, valideynlər üçün də faydalıdır.

Dağılma rəmzləri -  Çingiz Abdullayev

Bu məmulat “nüvə çamadanı” adlanır, daha doğrusu isə məhdud təsir radiuslu nüvə maddəsi. Bir sözlə, son dərəcə məxfi və təhlükəli  silahdır.

İndi fövqəladə bir hadisə baş verib – iki belə bir “çamadan” yoxa çıxıb, onları oğurlayan adamlar isə olduqca qəribə şəkildə həlak olub. İtkini nəyin bahasına olursa-olsun tapmaq – Rusiyanın bütün xüsusi xidmət orqanlarına verilən əmr məhz bu cürdür.

Cinayət aləminin liderləri və terrorçular da bu təhlükəli “oyuncağı”  ələ keçirmək niyyətindədir.

Lakin axtarışlar heç bir nəticə vermədiyi üçün xüsusi xidmət orqanları bu istintaqa ekspert-analitik Dronqonu da cəlb etmək məcburiyyətində qalırlar. İndi tapşırıq olduqca çətindir: Paris kimi bir yerdə – silah məhz orada üzə çıxmışdır – kiçik bir bombanı necə axtarıb tapmalı? 

Alicənab soyğunçu Arsen Lupen bizi nəfəsimizi kəsəcək macəraları ilə qarşılayır. Hər hekayədə onun kimliyini tanımaq və nə etdiyini başa düşmək üçün zəkamızın sərhədlərini  zorlayacağıq.

Bəzən Paris küçələrində, bəzən də möhtəşəm qalalarda Lupenin ardınca ağılasığmaz macəralara atılacağıq. Hər macəranın sonunda onun bacarığına və qabiliyyətinə heyranlığımız daha da artacaq. Oxucu olaraq özümüzü Arsen Lupenin sərgüzəştlərində nəfəs kəsən səyahətə çıxmış kimi hiss edəcəyik. Sirləri, müəmmaları, oyunları, maskaları, topları, gizli keçidləri ilə Arsen Lupen bizi təxəyyülümüzü genişləndirəcək macəralarına dəvət edir.

“Arsen Lupen – alicənab soyğunçu”  – fransız yazıçısı
Moris Leblana dünya şöhrəti qazandırmış
detektivlər seriyasından ilk kitabdır.