72 yaşlı Avqust Brill keçirdiyi avtomobil qəzasından sonra qızının Vermontdakı evində bərpa prosesi keçir. O, yuxusu qaçanda yatağına uzanıb öz-özünə hekayələr danışaraq unutmaq istədiyi bəzi şeylər - təzəcə ölən arvadı və nəvəsinin sevgilisi Titusun dəhşətli qətli barədə fikirləri özündən var gücü ilə qovmağa çalışır.
Təqaüdə çıxmış kitab tənqidçisi paralel dünya haqda xəyallar qurur. Həmin dünyada Amerika İraqla yox, özü ilə mübarizə aparır. Bu özgə Amerikada "Əkiz qüllələr" partlamayıb, 2000-ci il seçkilərinin nəticələri isə parçalanmaya səbəb olub. Ştatlar bir-birinin ardınca ittifaqdan qopandan sonra isə qanlı vətəndaş müharibəsi başlayıb. Gecə keçdikcə Brillin hekayəsi intensivləşir. Onun dilə gətirməkdən qaçdığı şeylər var. Lakin hansısa qüvvə onların dilə gətirilməsini israrla tələb edir. Brill sübh tezdən ona qoşulan nəvəsinə evlilik tarixçəsini nəql edir. Nəvəsi yuxuya gedəndən sonra isə özündə güc tapıb Titusun ölümündən sonra yaranan travmaya qayıdır...

"Məni heç vaxt tərk etmə" romanı təxminən 30 yaşlarında olan Keti adlı gənc qadının xatirələri əsasında yazılıb. Onun uşaqlığı və yeniyetməliyi Heylşemdəki qeyri-adi internat məktəbində keçib.
Hadisələr XX əsrin sonlarında, insanların orqan transplantasiyası əməliyyatları üçün canlı donor kimi klonlaşdırılıb yetişdirilməsinin geniş vüsət aldığı illərdə baş verir. Keti və onun internatdakı dostları məhz belə donor rolunda çıxış etməyə əla namizədlər sayılır. Onlar donor olana qədər müəyyən müddət "köməkçi" rolunda çıxış etməyə, artıq donor olmuş adamların qayğısına qalmağa məhkumdur. Adi insan həyatının ümumiləşdirilmiş metaforası kimi düşünülən romanda məhəbbət, tale, ruh azadlığı məsələləri ön plana çəkilib.
Kitab geniş oxucu kütləsi üçün nəzərdə tutulub.

Tapançamı hər iki əlimlə bərk-bərk sıxdım. Özümü tətiyi çəkməkdən zorla saxlayırdım.

Dodaqlarının yanından çənəsinə doğru uzanan bığları aralandı, fınxırdı, gözümün içinə dik baxdı. Ağzından sözlər güclə çıxdı:

- Mən səni gəbərtməmişdim, əclaf?

- Deyirdin ki, bu işlər şahmat oynamağa bənzəmir. Amma səhv etmisən, axmaq Bəkir! Bu işlər doğrudan da şahmat oyununa bənzəyir.

Bir-birinə qarışan üç atəş səsi düzənlikdəki boşluğa yayılıb səmaya doğru qalxdı.

Yazıçı Varisin "Uzaqdan gələn yağış" romanı müxtəlif dövrlərdə yaşamış gənclərin nakam məhəbbətindən bəhs edir.
İmkanlı bir ailənin gözünün ağı-qarası olan 11-ci sinif şagirdi Ayla təsadüfən metroda unudulmuş bir şeir dəftəri tapır. Şeirlər o qədər xoşuna gəlir ki, gedib onların müəllifi ilə - kənddən Bakıya güzəran qurmağa gəlmiş İsmayıl adlı, şair təbiətli kasıb gənclə tanış olur. Amma bu adi tanışlıq çılğın bir sevgi macərasına çevrilir, sonradan onların üzləşdiyi müsibət isə hər kəsi sarsıdır.
Ən sevimli şagirdi olan Aylanın başına gələnlər Rəhilə xanımı daha çox dəhşətə gətirir. O, Ayla ilə İsmayılın taleyində bütün sevən gənclərin taleyinə təhlükə duyur. Rəhilə xanım zahirən xoşbəxt qadındır. Gözəl ailəsi, uşaqları, yaxşı işi var, çalışdığı məktəbdə hamı tərəfindən sevilir. Amma bu qadının heç kimlə bölüşmədiyi, içində ağır yük kimi gəzdirdiyi bir dərdi var - o, uğursuz ilk məhəbbətini hələ də unuda bilmir. Ona görə də çalışır ki, şagirdlərinə, illah da qızlara sevgi məsələsində düzgün yol göstərsin, onları mümkün yanlış addımlardan çəkindirsin. İstəyir ki, valideynlərə təsir edə bilsin, onların övladları da mələk kimi məsum Aylanın qandonduran nakam taleyini yaşamasın...
Kitab geniş oxucu kütləsi üçün nəzərdə tutulub.

...O, Osmanlı Türkiyəsinin ən gözəl qadınlarından idi. Saray rəssamı Fausto Zonarodan dərs almışdı. Sonra təhsilini Paris və Romada tamamladı. Adını rəssamlıq sənətinə qızıl hərflərlə yazdırdı...
Osmanlı xanədanlığının xəfiyyələri ilə, Balkan qiyamçıları ilə, "İttihad və Tərəqqi"çilərlə mücadilə etdi... Qorxunun nə olduğunu bilmədi!
Könlünü özündən dörd yaş kiçik olan Yəhya Kamala təslim edəndə ərdə idi, üç övladı vardı. Böyük şair ona ithafən "Alagözlü qaplan" adı altında şeirlər yazdı. Gözəl qadın həyatında ilk dəfə özünü xoşbəxtlikdən göyün yeddinci qatında hiss edirdi. Öz sevgisi yolunda ərini, evini tərk etdi! Təəssüf ki, şair onun bu böyük məhəbbətini yaşada biləcək ürəyə sahib deyilmiş. Onu yarıyolda qoydu, üz döndərib getdi. Alagözlü Cəlilə buna çox üzüldü, sarsıldı, amma qürurunu da sındırmadı...
Eyni körpə iki dəfə dünyaya gələ bilərmi? Amma Cəlilə dünyaya gətirdi! Oğlu Nazim Hikmət 28 illik həbs cəzasının 12-ci ilində aclıq aksiyasına başladığı zaman bir aslan kimi meydana atıldı və böyük şairi ölümün caynağından qopardı...
Başı müsibətlər çəkmiş bu məşhur ailənin həyat hekayəsini birnəfəsə oxuyacaqsınız.

Bu roman gerçək həyat hekayəsi əsasında yazılıb. Somalidən olan gənc qız risk edir, həyatını təhlükəyə atır, olimpiadada iştirak etmək üçün miqrant kimi Avropaya səfər edir.
Hələ 8 yaşından Samiyənin əsas məqsədi qaçmaqdır. O, arzusunu ən yaxın dostu və qonşusu Əli ilə bölüşür. Əli onun "peşəkar məşqçisi" olmağı boynuna götürür. 8 yaşlı Əli onunla məşq edir, onu həvəsləndirir. Samiyənin qaçmaq şövqü hər iki uşaq üçün Somalidəki ağır həyatda bir işıq rolunu oynayır. Samiyə qoçaqdır, istedadlıdır, Somalidən olan məşhur atlet Mo Fara kimi ölkəsini olimpiadada təmsil etmək istəyir.
Samiyə ilə Əli bir neçə il gecələr boş stadionda məşq edirlər, çünki ölkədə müharibə başlayıb, gərginlik artıb. İdman ləvazimatları olmasa da, müharibə şəraitində, Somali qadınlarına qarşı sərt qadağaların tətbiq edildiyi bir vaxtda Samiyə dünya səviyyəli bir atlet olur. O, hələ yeniyetmə ikən ölkəsini 2008-ci il Pekin olimpiadasında təmsil edir. Yarışda finiş xəttinə ən sonuncu çatır, Veronika Kempbell-Braun kimi məşhur atletlər isə finişə birinci çatıb bütün stadionu ayağa qaldırır. Samiyə qarşısına 2012-ci il London olimpiadasında iştirak edib uğur qazanmaq məqsədi qoyur. Somalidə isə vəziyyət gündən-günə pisləşir. Samiyə miqrantlar kimi Afrikadan və Aralıq dənizindən keçib Avropaya getmək istəyir. Milyonlarla miqrant kimi o da xoşbəxt gələcək naminə həyatını təhlükəyə atıb qorxunc dəniz səfərinə çıxır və...
Cəsur bir qızın unudulmaz həyat hekayəsindən bəhs edən bu kitab həm də qlobal böhrana açılan bir pəncərədir.

Qəribə şəkildə şaxələnən, çoxlu qəhrəmanları və məharətlə qurulmuş süjeti olan bu roman-pritçanın mərkəzində XIX əsrin sonlarında doğulmuş böyük ziyalı Yakov Osetski ilə onun nəvəsi - teatr rəssamı, sərbəst və yaradıcı həyat sürən Noranın paralel taleləri dayanır. Onların "tanışlığı" XXI əsrin əvvəllərinə təsadüf edir. Nora babası Yakovla nənəsi Mariyanın məktublarını oxuduqdan sonra Dövlət Təhlükəsizlik Komitəsinin arxivində babasının şəxsi işi ilə tanış olur. Romanın əsasını müəllifin şəxsi arxivindəki məktublar təşkil edir. Əsərdə Azərbaycanla bağlı müəyyən ştrixlər də yer alıb.
Kitabda özünüdərk prosesindən, bizi formalaşdıran, ayıran və birləşdirən səbəblərdən, silinən və dərin izlər buraxaraq ötüb keçən konkret hadisələrdən, emosiya və ehtirasdan, kədər və sevgidən bəhs edilir.

Körpəliyindən yetim qalmış Filip Eşli əmisi oğlu - xeyirxah Embrouzun himayəsində böyüyür. Subay qalacağına qətiyyətlə qərar verən Embrouz Filipi öz varisi hesab edir və onun böyük mülkünə dəyər verəcəyinə inanır. Embrouzun Florensiya səfərindən sonra Filipin həyatı alt-üst olur. Orada eşqə düşən Embrouz evlənir və şübhəli şəraitdə qəflətən dünyasını dəyişir.
Az sonra Embrouzun dul arvadı - əmiqızı Reyçel İngiltərəyə gəlir. Heç nəyə əhəmiyyət verməyən Filip bu gözəl qadına valeh olur. Görəsən, Embrouzun qəfil ölümü ilə Reyçelin bir əlaqəsi ola bilərmi?

Yaşamağı öyrənmək üçün, görəsən, neçə ömür başa vurmaq lazımdır?

"Ağlasığmaz... Təsirli... Dərin məzmunlu..."
"Daily Telegraph"

"Zamana inanılmaz bir səyahət... Oxucuların böyük marağına səbəb olacaq və onlara hədsiz zövq verəcək".
"Observer"

"Heyrətamiz bir kitabdır..."
Stefen Fray

"Nəfəskəsici bir hekayə qələmə alınıb".
Qraham Norton

"Bir kəlmə ilə: MÖHTƏŞƏMDİR!"
Merian Kiz

Corc Sanders müasir ABŞ ədəbiyyatında qeyri-adi dəsti-xətti ilə seçilən, əsərləri onlarla ədəbiyyat mükafatına layiq görülən, kitabları "New York Times"ın bestsellerlər siyahısına düşən qələm ustalarındandır. "Time" jurnalının rəyinə görə, "ingilisdilli ədəbiyyatda ən yaxşı, "ən yaxşılardan biri" yox, "güman ki, ən yaxşı" da yox, məhz "ən yaxşı" təhkiyə ustası Corc Sandersdir.
Bəli, Sandersin sərrast müşahidəsi, incə yumoru neçə ildir ki, ədəbiyyat həvəskarlarının, ədəbi tənqidçilərin xüsusi diqqət mərkəzindədir. Bundan başqa, Sanders üçüncü şəxs kimi personajlarının fikrinə dalmaqla onların şəxsiyyətini açmağın böyük ustası sayılır. Yazıçı bundan ötrü bəzən primitivizm səviyyəsinə enməyə, bəzən mürəkkəb, qeyri-real fantastik mühitlər qurmağa hazırdır. Oxucu bu personajları iki baxış bucağından izləyir: obrazların daxili dialoqları vasitəsilə və onların beyninə "qonmuş" yazıçının təhkiyəsi vasitəsilə. Sanders konsyumerizmi, maniakal şoppinq azarını qamçılayır, ismarışlarını cəmiyyətə ən sadə yollarla göndərir.
Yazıçının üslubu son dərəcə mütəhərrikdir. Onun hekayələri rəvan, birnəfəsə mütaliə vəd edir, çünki onlar obrazların öz fikirləri ilə ifadə edilib - insan isə öz düşüncələrində heç vaxt yersiz təfərrüatlara varmır. "10 dekabr" hekayələr toplusu bu mənada Corc Sandersin bəlkə də ən gözəl əsərlərinin çələngidir.

Əsər XXI əsrin ən aktual problemlərindən biri sayılan surroqat analıq mövzusuna həsr olunub. Romanda təsvir edilən hadisələr Azərbaycanda baş verir. Övladı olmayan gənc bir ailənin daşıyıcı ana axtarışları sonda uğurla nəticələnir. Belə bir ailə tapılır və tərəflər müəyyən məbləğ müqabilində anlaşırlar. Lakin bu zaman ortaya milli mentalitetlə bağlı problemlər çıxır. Bu problem böyüdükcə razılaşdırılmış məbləğ də artır. Daşıyıcı ana olmağa razılaşan qadının əri qarşı tərəfin vəziyyətinin çıxılmaz olduğunu anlayır və bu fürsətdən istifadə edərək onlardan daha çox pul qoparmağa çalışır. "Namus, əxlaq, qeyrət, xəyanət" deyə-deyə çirkin oyunlar oynayır, şantaja əl atır. Proseslərin gedişi həm övlad arzulayan, həm də daşıyıcı ana olmağa razılaşan qadınları məcburi müttəfiqə, onların ərlərini isə düşmənlərə çevirir...

Psixoloji triller janrında yazılmış bu detektiv əsərdə əsas qəhrəmanlardan biri - Jak Reverdi ziddiyyətli cani-şəxsiyyət obrazı kimi müxtəlif rakurslardan işıqlandırılır. Onun idmanın suya dalma növü üzrə çempion olduğu mərhələyə qədərki yaşantıları və böyük idmandan ayrılandan sonrakı taleyi qəfil alışıb-yanan, dərhal da sönən təsirli səhnələr fonunda qələmə alınmışdır.

"Qaranlıq dolab"..."Tez gizlən, ata gəlir!"...Bunlar Jakın taleyindən qara xətt kimi keçərək həyata "vəsiqə almış" anlamlardır. Ruhuna hakim kəsilən, zehnini zəhərləyən və kabusa çevrilərək bütün həyatını izləyən bu məfhumlar, əfsus ki, onun qorxunc uşaqlığının, arzuolunmaz analı illərinin "yadigar"ıdır.

Yazıçı qəhrəmanının xarakterinin açılmasına kömək kimi bir jurnalist-müxbirin - uşaqlığı, gəncliyi Reverdidən heç də "mülayim" və asan keçməyən Markın səy və bacarıqlarını, peşəsi uğrunda hansı risklərə getdiyini sadə faktlarla təsvir edir.

Bu iki şəxsin sanki yaxınlaşan psixoloji durumu əsərin finalına doğru aydın səmada şimşək effekti yaradır. Onların oxşar sonluğu - əslində özlərinin heç təsəvvür də etmədiyi psixoloji uyğunluqlarının təsdiqi faktı narahat nəfəsi getdikcə daha çox duyulan "vulkan"partlayışının son nidası olur.

"Mobil rabitə şirkətinin rəhbəri, 200 milyon dollar sərvətə malik bu "telefon tanrısı"nın iki, ya da üç arvadı olub. Violetta isə varlı ər axtarışında olan ovçudur, amma bu dəfə onda heç nə alınmayacaq. Belələrinə indi "yeni amazonlar" deyirlər. Gənc qadınlardan ibarət bir dəstə yaranıb, onlar varlı kişiləri ovlamaqla məşğuldur. Amma Olqa ömründə imkan verməz ki, atası yüz milyonlarını təzə arvadının adına keçirsin. Deyəsən, Violetta da bundan duyuq düşüb..."

Detektiv əsərlər müəllifi Çingiz Abdullayevin "Yeni amazonlar klanı" adlı romanında hadisələr Rusiyanın paytaxtı Moskvadakı lüks villada cərəyan edir.
Köhnə Yeni ili qeyd etmək, eyni zamanda biznes sövdələşməsi aparmaq üçün elit bir kottec kirayələyərək ora toplaşan adamlar arasında daha kimlər yoxdur?! Rusiya Xarici İşlər Nazirliyinin idarə rəisi, "Rosvoorujeniye" dövlət şirkətinin ikinci şəxsi, xarici ölkə səfirlərindən biri, mobil rabitə və alüminim istehsalı şirkətlərinin zəngin rəhbərləri, şou-biznes ulduzları, gözəl qadınlar... Hər şey idealdır. Amma hələ heç ziyafət başlamamış malikanədə müəmmalı və dəhşətli hadisə baş verir - milyonçu biznesmenlərdən biri onun üçün ayrılmış otaqda qətlə yetirilir. İşə Daxili İşlər Nazirliyinin rəhbərliyi qarışır, amma müstəntiqlər heç bir ipucu tapa bilmir. Nazir müavini məşhur xəfiyyə Dronqoya müraciət etməli olur. Kriminalist-ekspert əvvəlcə villaya baş çəkir, hamını dindirir. O, əmindir ki, qatil mərhumun ən yaxın adamıdır...
Kitab geniş oxucu kütləsi üçün nəzərdə tutulub.

Detektiv əsərlər müəllifi Çingiz Abdullayevin "Vyana gecəsinin sirri" adlı romanında hadisələr Avstriya paytaxtındakı dəbdəbəli "Marriott" hotelində baş verir.
Yeni ili qarşılamaq üçün bura gələn bir qrup adam hotelin restoranında məşhur xəfiyyə Dronqonun ailəsi ilə təsadüfən masa qonşusu olur. Kriminalist-ekspert onların rus, alman və ingilis dillərindəki söhbətini istəmədən eşidir. Bir neçə saatdan sonra isə həmin masadakı adamlardan biri - zəngin biznesmen restoranın tualetində ölü tapılır. Peşə marağı Dronqoya güc gəlir. O, ailəvi istirahətini yarımçıq qoyub qatilin axtarışına çıxır. Dəqiq bilir ki, qatil elə həmin masada oturanlardan biridir...

"Qatil birinci mərtəbədəki bu əldən-ayaqdan uzaq tualetdə Qalimovu pusan kənar birisi ola bilməzdi. Kənar birisi onun həmin tualetdə ikinci dəfə peyda olacağını təxmin edə bilməzdi. Axı şirkət prezidenti burada birinci dəfə Veronika ilə olmuşdu. Sonra nədənsə ora yenidən düşmüşdü. Əgər tualetdə Qalimovu yenə qadın gözləyirdisə, bu adam, sadəcə, seksual manyakdır. Bəlkə, Qalimovun məhz ora gedəcəyini əvvəlcədən bilən kişi? Veronikanın yardım vəd etdiyi Farkaş? Qadın onu ora göndərə bilərdi. Ya da bir başqası... Yoxsa Farkaşa özünü tapança ilə vurmağı məsləhət görən David? Bəlkə, hansısa sirri açıqlayacağını söyləyən Ruslan? Ya da qadınlar?"

Kitab geniş oxucu auditoriyası üçün nəzərdə tutulub.

"İstəyirdim ki, onlar ölməmişdən əvvəl əzab çəksinlər. Hər şeyi bilsinlər və hiss etsinlər. Bilirəm ki, indi səsimi yazırlar, sonra hamısından mənə qarşı istifadə edəcəklər, amma cəhənnəm olsun, qoy yazsınlar... Onların bağ evinə girdim, ikisinin də əl-qolunu bağladım və qonşumun arvadına hər şeyi olduğu kimi danışdım. Dedim ki, əri mənim Katyamla ona xəyanət edib. Onun bundan xəbəri yox idi. Sonra mənim həyatımı məhv edən o alçağın gözünün qarşısında arvadını zorladım və öldürdüm. Qonşum ağlayaraq yalvarırdı ki, onun özünü də öldürüm. Mən də bunu məmnuniyyətlə etdim. Dolabda onların pulu var idi, ancaq ona toxunmadım - belə şeylər mənlik deyil. Qadının cəsədini isə maşında aparıb basdırmışam..."

Detektiv əsərlər müəllifi Çingiz Abdullayevin "Vicdanın adaptasiyası" adlı romanında bütün Rusiyanı ayağa qaldırmış seriya qatilin axtarışlarından, onun həbsindən, məhbəsdən qaçışından və intiharından bəhs edilir.
Əsasən gənc və sarışın qadınları hədəf seçərək Rusiyanın bir neçə şəhərində dəhşətli qətllər törədən və heç bir iz buraxmayan seksual manyakın axtarılmasına məşhur xəfiyyə və psixoanaliz üzrə professor da cəlb olunur. Səbəb aydındır: qatil çox ustalıqla hərəkət edir, ehtiyatlı davranır, getdiyi şəhərlərdə diqqət çəkməməyə çalışır. Öz doğma şəhərində isə ondan nəinki şübhələnməzlər, hətta bu fikrə düşənlərin özlərini daşqalaq edərlər. Axı Veniamin Borisoviç Baratov adi adam deyil, böyük bir institutun direktorudur, görkəmli alimdir, hörmətli şəxsdir; hamı onu mədəni, ziyalı, nəcib bir adam kimi tanıyır. Buna baxmayaraq, o zorlayır, öldürür və gizlənir...
Kitab geniş oxucu kütləsi üçün nəzərdə tutulub.

"...Ufada Tatyana Kasimovanın cəsədi tapılıb. Məktəbin yanında xaraba bina var, cinayətkar öz qurbanını aldadaraq ora aparıb. Həmin bina mərhumun işdən evə qayıtdığı yolun üstündədir. Qatilin Ufaya başqa şəhərdən gəldiyi və Kasimovaya vağzaldan zəng etdiyi müəyyən olunub. Cəsəd hadisədən bir müddət keçəndən sonra tapılıb deyə izlərin çoxu itib. Lakin dəsti-xəttin oxşarlığı Ufa və Çelyabinskdə törədilmiş cinayətlərin eyniyyət təşkil etdiyini göstərir. Hər iki hadisə zamanı qatil hansısa yolla öz qurbanını müvəqqəti olaraq huşsuz vəziyyətə sala və zorlaya bilib. Ola bilər ki, buna hipnozun köməyi ilə nail olub, yaxud da hansısa dərmandan istifadə edib. Qurbanların qanında heç bir yad maddə aşkar olunmayıb..."

Detektiv əsərlər müəllifi Çingiz Abdullayevin "Qurbanlıq sindromu" adlı romanı hüquq-mühafizə orqanları əməkdaşlarının yuxusunu ərşə çəkmiş seriya qatilin axtarışlarından bəhs edir.
Polis, xüsusi xidmət orqanları, kriminalist-ekspertlər Rusiyanı sarsıtmış seksual manyakın axtarışına cəlb olunub. Onu nəinki tapmaq, hətta izinə düşmək isə heç cür mümkün olmur. Çünki çox ağıllı və hiyləgərdir, iz buraxmır, özünü çox sakit və təmkinli aparır, kiminsə ondan şühbələnməsinə əsas vermir. Buna görə də ayrı-ayrı şəhərlərə rahatlıqla baş çəkərək eyni üsulla dalbadal qətllər törədir. Hətta artıq axtarıldığını bilə-bilə də soyuqqanlılıqla zorlayıb öldürməkdə davam edir. Qatil əsasən gənc və gözəl qadınları "ovlayır", bir şərtlə ki, onlar həm də savadlı, ziyalı olmalıdır, cəmiyyətdə normal mövqe sahibi olmalıdır. Onu elə bu zəifliyi də ələ verir...
Kitab geniş oxucu kütləsi üçün nəzərdə tutulub.

"O, öz qurbanlarını təcavüz vaxtı boğur, belə ağlasığmaz üsulla həzz alırdı. O, qadınları əvvəlcə hansı yollasa neytrallaşdırır, hipnozdan, yaxud tibb elmi ilə tanışlığı varsa, tez həll olan zəhərdən istifadə edirdi...
...Qadının əynindəki göy don Veniaminə öküzü qızışdıran qırmızı parça kimi təsir göstərirdi. O, Katyanı vurdu. Zərbə o qədər güclü idi ki, qadının partlamış dodağından qan gəldi. Qan onu lap coşdurdu. Veniaminin içində çoxdan mürgüləməkdə olan yırtıcı heyvan oyandı. Qadının donunu cıranda onu həm də bərk-bərk qucaqlayırdı. Katya birdən anladı ki, Veniamin onu zorlamaq istəyir..."

Detektiv əsərlər müəllifi Çingiz Abdullayevin "Bumeranq zərbəsi" adlı romanında seriya qatilin axtarışlarına cəlb edilmiş hüquq-mühafizə orqanlarının üzləşdiyi çətinliklər təsvir olunur.
Hadisələr Rusiyanın bir neçə şəhərində cərəyan edir, daha doğrusu, seksual manyak olan qatil ayrı-ayrı şəhərlərdə eyni üsulla dalbadal qətllər törədir. Tədbirlilikdə və amansızlıqda Çikatilo ilə müqayisə olunan qatilin qurbanları əsasən gənc və gözəl qadınlardır. O, qurbanlarını səbirlə izləyir, yaxalayır və zorlayıb öldürür, amma heç bir iz qoymur. Onu görən də yoxdur. Ufada qətl törədib Çelyabinskə gedir, oradan başqa şəhərə keçir. Moskvadakı yüksək rütbəli milis məmurları başını itirib. İşə məşhur xəfiyyə və psixoanaliz üzrə professor da cəlb olunur. Bu iki ekspert qatilin psixoloji portretini yaradır, onun intellektual, yaraşıqlı, ünsiyyətcil və gənc bir adam olduğunu deyirlər. Yüksək rütbəli milis zabitləri bundan narazı qalır...
Kitab geniş oxucu kütləsi üçün nəzərdə tutulub.

"...Bu qətldən sonra villada daha bir atəş səsi eşidildi. Kristinin yataq otağında kimsə yox idi. Moniçellinin ona bitişik yataq otağı da boş idi. Aqnessa ilə Qorlaçın qaldığı otağın işığı yanırdı, ancaq orada da şübhəli bir şey gözə dəymirdi. Başqa bir yataq otağında olan yarıçılpaq Alisa atəş səsinin haradan gəldiyini anlamamışdı. Yuhan hamamda olduğundan, ümumiyyətlə, heç nə eşitməmişdi.
Onlar üçüncü mərtəbəyə qalxdılar. Lindsi artıq orada onları gözləyirdi. O da atəşi xatırladan boğuq səs eşitmişdi. Onlar Morqunasın qapısını döydülər. O, bir dəqiqədən sonra ağ-göy zolaqlı gülməli xalatda çıxdı. Ancaq o da heç nə eşitməmişdi. Qonşu otaqda isə onlar axtardıqlarını, axır ki, tapdılar. Daniel Barnard döşəməyə uzanmışdı. Yanında tapança vardı..."

Detektiv əsərlər müəllifi Çingiz Abdullayevin "Maskanın hakimiyyəti" adlı romanında hadisələr uzaq və ekzotik Barbados adasında baş verir.
Hollivud olduzu Kristin Lindeqrenin həyatı təhlükədədir. Əri də milyonçu olan və son vaxtlar on milyonlarla dollarlıq mirasını necə böləcəyindən tez-tez danışan aktrisa ailə üzvləri ilə birgə Barbados adasındakı villasına tətilə getməyə hazırlaşır. Səfərdən qabaq isə ona iki təhdid məktubunun gəldiyini bəyan edərək təhlükəsizlik tədbirləri görməyin vacib olduğunu bildirir. Onun buna əsası var. Bu səfər ərəfəsində villada qəribə hadisələr baş verir: aktrisanın yeniyetmə oğlu sevgilisi olan "şübhəli rus qızı ilə" villaya baş çəkir, bacısının hamilə qızı "naməlum səbəb"dən ölür. Tətil günlərində isə Lindeqrenin əvvəlcə varlı əri, sonra da özü müəmmalı şəkildə qətlə yetiriləcəkdi...
Kitab geniş oxucu kütləsi üçün nəzərdə tutulub.

"...Elə bu an hardasa ağacların arxasından bir kişi göründü. Onun əlində nəsə parıldadı və Dronqo anındaca reaksiya verdi. O, Reçeli var gücü ilə kolluğa itələdi. Kişi tapançanı havaya qaldırdı. Ay işığında parlayan tapançanın lüləsində səsboğucu vardı. Astadan şıqqıltı səsi eşidiləndə Dronqo digər tərəfə tullandı. Güllələr bir-birinin ardından arxalarındakı ağacın üstünə yağdı. Reçel uzanıb qalmışdı. Qatil ehtiyatla onlara tərəf addımladı. Dronqo dişlərini sıxdı. Yıxılarkən çiynini bərk zədələmişdi, amma indi inildəmək olmazdı. Hər ötən saniyədə qatil bir az da yaxınlaşırdı. Reçel susurdu. Olmaya qadın gülləyə tuş gəlmişdi?! Bu ola bilməz, sadəcə ola bilməz! Qatil lap yaxında idi..."

Detektiv əsərlər müəllifi Çingiz Abdullayevin "Folun bir addımlığında" adlı romanında hadisələr Türkiyədə cərəyan edir.
Sankt-Peterburqun "Dinamo" futbol klubu Türkiyədə bir həftəlik təlim-məşq toplanışı keçirir. Futbolçuların qaldığı hotelin barında komandanın baş məşqçisi təsadüfən uzaq tanışı, cinayət məsələləri üzrə məşhur ekspert Dronqo ilə rastlaşır. Fürsəti fövtə verməyən baş məşqçi xəfiyyədən kömək istəyir. Sən demə, hər oyun öncəsi qapıçı Yepifantsev özünü pis hiss edirmiş. Sonuncu dəfə isə onun stəkanında çox güclü təsirə malik dərmanın qalıqlarını aşkarlayırlar. Deyəsən, qapıçını zəhərləməyə çalışmışdılar... Daha sonra komandanın həkimi müəmmalı şəkildə ölür, ardınca da ekspertin özünü güllələmək istəyən mafiya üzvləri peyda olur... Dronqo bunun rəqiblərin fitnə-fəsadı olduğunu ehtimal edir. Ekspert necə yanıldığını kaş bilsəydi...
Kitab geniş oxucu kütləsi üçün nəzərdə tutulub.